អភិបាលស្រុកអង្គរបូរី ខេត្តតាកែវ ទទួលមរណភាពដោយជំងឺ ខណៈកំពុងព្យាបាលនៅវៀតណាម

(តាកែវ)៖ លោក រស់ ប៊ុនធឿន អភិបាល នៃគណៈអភិបាលស្រុកអង្គរបូរីបានទទួលមរណភាពនៅថ្ងៃទី២៨ ខែមីនា ឆ្នាំ២០២៦ វេលាម៉ោង ៣រសៀល នៅមន្ទីរពេទ្យញឹកតឹង (ចូវដុក) ខេត្តអានយ៉ាង ប្រទេសវៀតណាម បន្ទាប់ពីមានជំងឺសួត និងជំងឺគាំងបេះដូង។

យោងតាមរបាយការណ៍ផ្លូវការ លោក រស់ ប៊ុនធឿន កើតនៅថ្ងៃទី២៥ ខែកញ្ញា ឆ្នាំ១៩៦៩ ជាមន្ត្រីក្របខណ្ឌគ្រប់គ្រងរដ្ឋបាលជាន់ខ្ពស់ ថ្នាក់លេខ ក១.៤ ដែលបានបម្រើការងារជា”អភិបាលស្រុកអង្គរបូរី” និងមានបទពិសោធន៍ក្នុងការដឹកនាំ និងបម្រើសេវាសាធារណៈជូនប្រជាពលរដ្ឋក្នុងមូលដ្ឋានយ៉ាងសកម្ម។

ប្រភពដដែលបញ្ជាក់ថា មុនពេលទទួលមរណភាព លោកបានចូលព្យាបាលនៅប្រទេសវៀតណាម ដោយសារជំងឺធ្ងន់ធ្ងរ ហើយទោះបីមានការខិតខំជួយសង្គ្រោះពីក្រុមគ្រូពេទ្យក៏ដោយ ក៏មិនអាចជួយសង្គ្រោះជីវិតលោកបានឡើយ។

បច្ចុប្បន្ន សពលោកត្រូវបានដឹកមកតម្កល់ធ្វើបុណ្យតាមប្រពៃណីសាសនា នៅគេហដ្ឋាន ស្ថិតក្នុងភូមិអង្គក្រូច ឃុំបូរីជលសារ ស្រុកបូរីជលសារ ខេត្តតាកែវ ក្រោមបរិយាកាសសោកស្តាយពីក្រុមគ្រួសារ មិត្តភក្តិ និងមន្ត្រីរាជការគ្រប់លំដាប់ថ្នាក់។

ការបាត់បង់លោក រស់ ប៊ុនធឿន ត្រូវបានគេចាត់ទុកថា ជាការបាត់បង់ធនធានមនុស្សដ៏សំខាន់មួយរបស់រដ្ឋបាលមូលដ្ឋាន ដែលធ្លាប់បានចូលរួមយ៉ាងសកម្មក្នុងការអភិវឌ្ឍស្រុកអង្គរបូរី និងលើកកម្ពស់សេវាសាធារណៈក្នុងតំបន់៕