បែកធ្លាយ! ទីតាំងល្បែងក្រោយអតីតក្រសួងដែនដី អ្នកលេងរត់ប្រសាច់មុនសមត្ថកិច្ចចុះ

(ភ្នំពេញ)៖ ទិដ្ឋភាពចលាចលមួយបានកើតឡើងនៅតំបន់ខាងក្រោយអតីតក្រសួងដែនដី ស្ថិតលើផ្លូវលេខ៩៥ ក្នុងខណ្ឌចំការមន ខណៈអ្នកញៀនល្បែងជាច្រើននាក់នាំគ្នាចាកចេញយ៉ាងប្រញាប់ប្រញាល់ ពីទីតាំងសង្ស័យជាកន្លែងភ្នាល់ល្បែងទ្រង់ទ្រាយធំ បន្ទាប់ពីបណ្តាញព័ត៌មានក្នុងស្រុកបានផ្សព្វផ្សាយ និងអំពាវនាវឲ្យអាជ្ញាធរចូលមកបង្ក្រាប។

ប្រភពពីក្នុងតំបន់បានបង្ហើបថា ភ្លាមៗបន្ទាប់ពីព័ត៌មានត្រូវបានផ្សាយ មានការជូនដំណឹងជាមុនទៅម្ចាស់ទីតាំង ធ្វើឲ្យមានការរៀបចំឲ្យអ្នកលេងល្បែងចាកចេញជាបណ្តោះអាសន្ន ដើម្បីជៀសវាងការចុះត្រួតពិនិត្យ។ ប្រភពដដែលបានសង្ស័យថា អាចមាន “រនុកក្នុង” ផ្តល់ព័ត៌មានជាមុន ដែលធ្វើឲ្យប្រតិបត្តិការរបស់សមត្ថកិច្ចបាត់បង់ប្រសិទ្ធភាព និងបង្កើតភាពមិនទុកចិត្តពីសំណាក់សាធារណជន។

សេចក្តីរាយការណ៍បន្ថែមបញ្ជាក់ថា ទីតាំងនេះបង្ហាញខ្លួនជាក្លឹបស្នូកឃ័រ ប៉ុន្តែក្នុងការពិតវិញ ខាងក្នុងត្រូវបានគេអះអាងថា មានសកម្មភាពល្បែងស៊ីសងយ៉ាងសកម្ម និងមានទឹកប្រាក់ចរាចរណ៍រាប់ម៉ឺនដុល្លារក្នុងមួយថ្ងៃ។ ជាពិសេស គេក៏បានលើកឡើងពីការចូលរួមរបស់មនុស្សជាច្រើនស្រទាប់ រួមទាំងបុគ្គលពាក់ព័ន្ធនឹងអង្គភាពមួយចំនួនផងដែរ ដែលបង្កើនការព្រួយបារម្ភអំពីឥទ្ធិពលនៅពីក្រោយទីតាំងនេះ។

បើទោះបីមានការផ្សាយជាបន្តបន្ទាប់ពីសំណាក់សារព័ត៌មាន ក៏ដោយ ប្រភពបានអះអាងថា កន្លងមកសមត្ថកិច្ចធ្លាប់ចុះត្រួតពិនិត្យ ប៉ុន្តែសេចក្តីរាយការណ៍ដែលដាក់ជូនថ្នាក់លើត្រូវបានគេថា មិនឆ្លុះបញ្ចាំងពីស្ថានភាពជាក់ស្តែង ដោយលើកឡើងថា មានតែសកម្មភាពស្នូកឃ័រធម្មតាប៉ុណ្ណោះ។ ការអះអាងបែបនេះ បានបង្កឲ្យមានសំណួរធំមួយលើភាពស្មោះត្រង់ និងតម្លាភាពក្នុងការអនុវត្តច្បាប់។

ស្ថានភាពនេះ ក៏បានធ្វើឲ្យប្រជាពលរដ្ឋមូលដ្ឋានបាត់បង់ជំនឿលើអាជ្ញាធរ មូលដ្ឋាន ហើយបានអំពាវនាវដោយផ្ទាល់ទៅកាន់ស្នងការនគរបាលរាជធានីភ្នំពេញ ឲ្យចាត់វិធានការយ៉ាងតឹងរឹង និងមានប្រសិទ្ធភាព ដើម្បីបញ្ឈប់សកម្មភាពល្បែងស៊ីសងខុសច្បាប់ដែលបានបន្តអស់រយៈពេលជាច្រើនឆ្នាំមកនេះ។

ជាក់ស្តែង ល្បែងស៊ីសងត្រូវបានគេដឹងថា ជាមូលហេតុបង្កជាបញ្ហាសង្គមជាច្រើន ដូចជា អំពើហិង្សាក្នុងគ្រួសារ បទល្មើសលួចប្លន់ និងការពាក់ព័ន្ធនឹងគ្រឿងញៀន។ ដូច្នេះ ការបង្ក្រាប និងទប់ស្កាត់ត្រូវការការសហការយ៉ាងជិតស្និទ្ធពីគ្រប់ភាគីពាក់ព័ន្ធ ដើម្បីធានាបាននូវសុវត្ថិភាព និងសន្តិសុខសម្រាប់ប្រជាពលរដ្ឋ។

ប្រជាពលរដ្ឋបានបង្ហាញក្តីសង្ឃឹមថា អាជ្ញាធរនឹងមិនត្រឹមតែចុះត្រួតពិនិត្យតាមបែបផ្លូវការប៉ុណ្ណោះទេ ប៉ុន្តែត្រូវអនុវត្តច្បាប់ដោយស្មោះត្រង់ និងមានតម្លាភាព ដើម្បីលុបបំបាត់ទីតាំងល្បែងខុសច្បាប់ និងស្ដារឡើងវិញនូវជំនឿរបស់សាធារណជនលើការអនុវត្តច្បាប់នៅមូលដ្ឋាន៕