អាវុធហត្ថកំពង់ស្ពឺបន្តបង្រ្កាបក្មេងទំនើងយ៉ាងតឹងរឹង ឃាត់ខ្លួន២នាក់ ករណីបង្ហោះម៉ូតូ បង្កហានិភ័យសាធារណៈ

(កំពង់ស្ពឺ)៖ ក្រោមការអនុវត្តយ៉ាងម៉ឺងម៉ាត់តាមបទបញ្ជារបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ឲ្យកងកម្លាំងមានសមត្ថកិច្ចទាំងអស់ពង្រឹងវិធានការបង្ការ និងបង្រ្កាបក្រុមក្មេងទំនើងឱ្យបានតឹងរឹងបំផុត កងរាជអាវុធហត្ថខេត្តកំពង់ស្ពឺ ក្រោមការដឹកនាំដោយលោកឧត្តមសេនីយ៍ត្រី ម៉េង ស្រ៊ុន បានបន្តអនុវត្តវិធានការប្រកបដោយប្រសិទ្ធភាព និងទទួលបានលទ្ធផលជាក់ស្តែងជាបន្តបន្ទាប់។

សកម្មភាពបង្រ្កាបនេះ ក៏អនុវត្តស្របតាមការណែនាំរបស់ ឯកឧត្តមនាយឧត្តមសេនីយ៍ សៅ សុខា និងការចង្អុលបង្ហាញពីឯកឧត្តមបណ្ឌិត ជាម ច័ន្ទសោភ័ណ ដែលជាគណៈបញ្ជាការឯកភាពខេត្តកំពង់ស្ពឺ ដោយផ្តោតលើការរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈក្នុងមូលដ្ឋាន។

ជាក់ស្តែង នៅវេលាម៉ោង ២៣:០០នាទី ថ្ងៃទី២៦ ខែមីនា ឆ្នាំ២០២៦ កម្លាំងការិយាល័យព្រហ្មទណ្ឌនៃកងរាជអាវុធហត្ថខេត្តកំពង់ស្ពឺបានទទួលជនសង្ស័យចំនួន២នាក់ ពាក់ព័ន្ធនឹងសកម្មភាព “ក្មេងទំនើង បង្ហោះម៉ូតូ” ដែលបានប្រព្រឹត្តនៅវេលាម៉ោង២២:២០នាទី នាថ្ងៃដដែល លើផ្លូវជាតិលេខ០៤ ស្ថិតក្នុងភូមិព្រៃស្លឹក សង្កាត់ច្បារមន ក្រុងច្បារមន។

ជនសង្ស័យទាំងពីរនាក់ រួមមាន៖ ទឿង ឌីណា អាយុ ១៧ឆ្នាំ មុខរបរ កម្មកររោងចក្រ។ ជាប វាសនា អាយុ ១៨ឆ្នាំ មុខរបរ កម្មកររោងចក្រ។ ទាំងពីរនាក់មានទីលំនៅក្នុងស្រុកសាមគ្គីមុនីជ័យ ខេត្តកំពង់ស្ពឺ។ វត្ថុតាងដែលត្រូវបានដកហូត រួមមាន ម៉ូតូម៉ាក Honda Dream សេរីឆ្នាំ២០២៥ ពណ៌ខ្មៅ គ្មានផ្លាកលេខ ១គ្រឿង ទូរស័ព្ទចំនួន២គ្រឿង និងប្រាក់រៀលចំនួន ១៩៣,៥០០រៀល។

បច្ចុប្បន្ន ជនសង្ស័យទាំង២នាក់ ត្រូវបានយកមកធ្វើការអប់រំ និងធ្វើកិច្ចសន្យាបញ្ឈប់សកម្មភាពទំនើងគ្រប់ប្រភេទ ដែលអាចប៉ះពាល់ដល់សុវត្ថិភាពសង្គម ការសិក្សា កិត្តិយសគ្រួសារ និងបង្កភាពអនាធិបតេយ្យក្នុងសហគមន៍។ ជាមួយគ្នានេះ អាវុធហត្ថបានសម្រេចដកហូតម៉ូតូជាមធ្យោបាយប្រើប្រាស់ក្នុងបទល្មើស ដើម្បីរក្សាទុករយៈពេល ៣ខែនៅទីបញ្ជាការ។

សកម្មភាពបង្រ្កាបជាបន្តបន្ទាប់នេះ បង្ហាញពីការប្តេជ្ញាចិត្តខ្ពស់របស់លោកឧត្តមសេនីយ៍ត្រី ម៉េង ស្រ៊ុន ក្នុងការអនុវត្តបទបញ្ជាថ្នាក់លើ និងការពារសន្តិសុខសាធារណៈ។ វាមិនត្រឹមតែជាការអនុវត្តច្បាប់ទេ ប៉ុន្តែថែមទាំងជាការអប់រំ និងការពារយុវជនឲ្យត្រឡប់មកវិញលើផ្លូវត្រឹមត្រូវ ដោយផ្តោតលើការបង្ការ ជាងការផ្តន្ទាទោស។

ជាមួយនឹងវិធានការដ៏តឹងរឹង ប៉ុន្តែមានលក្ខណៈមនុស្សធម៌នេះ កងរាជអាវុធហត្ថខេត្តកំពង់ស្ពឺ កំពុងក្លាយជាគំរូមួយក្នុងការគ្រប់គ្រង និងទប់ស្កាត់បញ្ហាក្មេងទំនើង ដែលជាបញ្ហាសង្គមគួរឲ្យព្រួយបារម្ភនៅពេលបច្ចុប្បន្ន៕