ការផ្សព្វផ្សាយព័ត៌មានមិនត្រឹមត្រូវលើបណ្តាញសង្គម បង្កការយល់ច្រឡំ ខណៈសមត្ថកិច្ចបញ្ជាក់ច្បាស់ពីភារកិច្ចពិត

(ភ្នំពេញ)៖ ថ្មីៗនេះ ករណីផ្សព្វផ្សាយព័ត៌មានមិនបានផ្ទៀងផ្ទាត់ត្រឹមត្រូវមួយ បានបង្កឲ្យមានការយល់ច្រឡំ និងការរិះគន់លើបណ្តាញសង្គម បន្ទាប់ពីគណនីហ្វេសប៊ុកមួយឈ្មោះ Kim Lay បានបង្ហោះវីដេអូពីកាមេរ៉ាសុវត្ថិភាពភ្ជាប់ជាមួយខ្លឹមសារចោទប្រកាន់ថា “មានមន្រ្តីដើរលក់បំពង់ពន្លត់អគ្គិភ័យ និងគំរាមផាកពិន័យប្រជាពលរដ្ឋ ប្រសិនបើមិនមានឧបករណ៍តាមស្តង់ដារ”។

ការផ្សព្វផ្សាយនេះ បានទាក់ទាញការចាប់អារម្មណ៍យ៉ាងខ្លាំងពីមហាជន និងបង្កឲ្យមានមតិរិះគន់ចំពោះសមត្ថកិច្ចជំនាញ។ ទន្ទឹមនឹងនេះ នៅព្រឹកថ្ងៃទី២៧ ខែមីនា ឆ្នាំ២០២៦ លោក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យអង្គភាពជំនាញបង្ការ ពន្លត់អគ្គិភ័យ និងសង្គ្រោះ ចុះស្រាវជ្រាវភ្លាមៗ ដើម្បីបំភ្លឺការពិតជុំវិញករណីនេះ។

តាមការស្រាវជ្រាវ បានបញ្ជាក់ថា នៅថ្ងៃទី២៦ ខែមីនា ឆ្នាំ២០២៦ វេលាម៉ោងប្រហែល ១០:០០ ព្រឹក កម្លាំងជំនាញចំនួន ៤នាក់ បានចុះអនុវត្តភារកិច្ចផ្សព្វផ្សាយអប់រំដល់ប្រជាពលរដ្ឋ នៅក្នុងបុរីសំបួរមាស សង្កាត់ដង្កោ ខណ្ឌដង្កោ ដោយផ្តោតលើការបង្ការអគ្គិភ័យ និងការប្រើប្រាស់បំពង់ពន្លត់អគ្គិភ័យ ក្នុងបរិបទរដូវបុណ្យចូលឆ្នាំថ្មីប្រពៃណីជាតិ។

ក្នុងអំឡុងពេលចុះបំពេញភារកិច្ច មន្រ្តីបានឈប់នៅមុខផ្ទះម្ចាស់គណនី Kim Lay និងគោះទ្វារដើម្បីអញ្ជើញម្ចាស់ផ្ទះទទួលការណែនាំបច្ចេកទេសអំពីសុវត្ថិភាពអគ្គិភ័យ ប៉ុន្តែមិនមានអ្នកនៅផ្ទះ។ បន្ទាប់មក ក្រុមការងារបានបន្តទៅផ្សព្វផ្សាយនៅគេហដ្ឋានផ្សេងៗ ដោយគ្មានសកម្មភាពលក់ ឬបង្ខំអ្វីឡើយ។

យ៉ាងណាក៏ដោយ ក្រោយមក ម្ចាស់គណនីខាងលើ បានយកវីដេអូនេះទៅផ្សព្វផ្សាយជាមួយនឹងការសរសេរខ្លឹមសារមិនមានមូលដ្ឋានច្បាស់លាស់ ដែលនាំឲ្យសាធារណជនយល់ច្រឡំ និងប៉ះពាល់ដល់កិត្តិយស និងសេចក្តីថ្លៃថ្នូររបស់មន្រ្តីជំនាញដែលកំពុងបំពេញភារកិច្ចតាមវិជ្ជាជីវៈ។

សមត្ថកិច្ចបានព្យាយាមទំនាក់ទំនងម្ចាស់គណនីដើម្បីសុំការបំភ្លឺ ប៉ុន្តែមិនទទួលបានការឆ្លើយតបតាមទូរស័ព្ទ។ ទោះជាយ៉ាងណា តាមប្រព័ន្ធតេឡេក្រាម ម្ចាស់គណនីបានបញ្ជាក់ថា ខ្លួនមិនបានជួបសមត្ថកិច្ចដោយផ្ទាល់ទេ ហើយវីដេអូដែលបានបង្ហោះ គ្រាន់តែជាការលើកឡើងជាចម្ងល់សាធារណៈ មិនមែនជាការចោទប្រកាន់ដោយមានភស្តុតាងជាក់លាក់នោះឡើយ។

ជាក់ស្តែង តាមគោលការណ៍របស់ស្នងការដ្ឋាននគរបាលរាជធានីភ្នំពេញ ការចុះផ្សព្វផ្សាយរបស់មន្រ្តីជំនាញ គឺមានគោលបំណងអប់រំ និងលើកកម្ពស់ការយល់ដឹងអំពីសុវត្ថិភាពអគ្គិភ័យប៉ុណ្ណោះ មិនមានការបង្ខំឲ្យប្រជាពលរដ្ឋទិញបំពង់ពន្លត់អគ្គិភ័យ ឬផាកពិន័យដូចការចោទប្រកាន់ឡើយ។ ករណីប្រជាពលរដ្ឋមានបំណងទិញ គឺអាចធ្វើបានដោយស្ម័គ្រចិត្ត និងតាមតម្លៃទីផ្សារ។

សមត្ថកិច្ចជំនាញក៏បានបដិសេធយ៉ាងតឹងរឹងចំពោះព័ត៌មានថា មានការផាកពិន័យចំពោះគេហដ្ឋានដែលមិនមានបំពង់ពន្លត់អគ្គិភ័យតាមស្តង់ដារ ដោយបញ្ជាក់ថា មិនមានគោលការណ៍បែបនោះឡើយ។ ទន្ទឹមនឹងនេះ អាជ្ញាធរបានព្រមានថា ប្រសិនបើមានមន្រ្តីណាប្រព្រឹត្តលើសសិទ្ធិ ឬខ្វះក្រមសីលធម៌វិជ្ជាជីវៈ នឹងត្រូវអនុវត្តវិធានវិន័យយ៉ាងតឹងរឹងតាមបទបញ្ជារបស់កងកម្លាំងនគរបាលជាតិ។

ករណីនេះជាការរំលឹកដ៏សំខាន់មួយថា ការប្រើប្រាស់បណ្តាញសង្គមត្រូវមានការទទួលខុសត្រូវ និងគោរពវិជ្ជាជីវៈព័ត៌មាន ដើម្បីជៀសវាងការបង្កការយល់ច្រឡំក្នុងសង្គម និងការប៉ះពាល់ដល់កិត្តិយសរបស់អ្នកដទៃ៕