តាកែវបង្ហាញសក្ដានុពលដល់វិនិយោគិនអាស៊ាន-ចិន ខណៈអភិបាលខេត្ត វ៉ី សំណាង ធានាថា អាជ្ញាធរខេត្តនឹងបន្តបង្កលក្ខណៈងាយស្រួល ផ្តល់សេវាសម្របសម្រួល និងគាំទ្រគ្រប់បែបយ៉ាង

(ខេត្តសានទុង-ចិន)៖ ក្នុងឱកាសអញ្ជើញចូលរួមកិច្ចប្រជុំខួបទី៥ នៃភាពជាដៃគូយុទ្ធសាស្ត្រគ្រប់ជ្រុងជ្រោយ អាស៊ាន-ចិន និងពិធីដាក់ឱ្យដំណើរការ «ឆ្នាំនៃការផ្លាស់ប្តូរ និងសហប្រតិបត្តិការរវាងខេត្តសានទុង និងអាស៊ាន ឆ្នាំ២០២៦» នៅថ្ងៃទី២៦ ខែមីនា ឆ្នាំ២០២៦នេះ លោក វ៉ី សំណាង អភិបាលខេត្តតាកែវ បានធ្វើបទបង្ហាញយ៉ាងច្បាស់លាស់ពីសក្ដានុពលសំខាន់ៗរបស់ខេត្ត ដល់តំណាងក្រុមហ៊ុនជាង៧០ មកពីបណ្តាប្រទេសអាស៊ាន និងខេត្តសានទុង ប្រទេសចិន។

ក្នុងបទបង្ហាញនេះ លោកអភិបាលខេត្តបានរំលេចយ៉ាងច្បាស់ពីកាលានុវត្តភាព និងសមត្ថភាពប្រកួតប្រជែងរបស់ខេត្តតាកែវ ជាពិសេសលើវិស័យកសិកម្ម កសិ-ឧស្សាហកម្ម និងវិស័យទេសចរណ៍ ដែលកំពុងមាននិន្នាការរីកចម្រើន និងបើកទូលាយសម្រាប់ការវិនិយោគថ្មីៗ។ ជាមួយគ្នានេះ ខេត្តមានប្រជាពលរដ្ឋជាងមួយលាននាក់ ដែលមានកម្លាំងពលកម្មសកម្ម ស្មោះត្រង់ និងមានសក្តានុពលឆ្លើយតបទៅនឹងតម្រូវការរបស់រោងចក្រ និងសហគ្រាសនានា។

មិនត្រឹមតែប៉ុណ្ណោះ លោក វ៉ី សំណាង ក៏បានលើកឡើងពីអត្ថប្រយោជន៍សំខាន់ៗនៃហេដ្ឋារចនាសម្ព័ន្ធ ដែលរួមមានផ្លូវថ្នល់ ផ្លូវទឹក ផ្លូវដែក និងផ្លូវអាកាស ដែលភ្ជាប់ទៅកាន់ខេត្តតាកែវ យ៉ាងងាយស្រួល បង្កើនភាពងាយស្រួលក្នុងការដឹកជញ្ជូន និងជំរុញការវិនិយោគឲ្យកាន់តែមានប្រសិទ្ធភាព។

អភិបាលខេត្តតាកែវបានអំពាវនាវដល់វិនិយោគិនចិន និងបណ្តាប្រទេសអាស៊ាន ឲ្យចូលរួមវិនិយោគនៅខេត្តតាកែវ ដោយធានាថា អាជ្ញាធរខេត្តនឹងបន្តបង្កលក្ខណៈងាយស្រួល ផ្តល់សេវាសម្របសម្រួល និងគាំទ្រគ្រប់បែបយ៉ាង ដើម្បីធានាបរិយាកាសវិនិយោគប្រកបដោយភាពទំនុកចិត្ត និងចីរភាព។

វេទិកានេះត្រូវបានចាត់ទុកថាជាវេទិកាសំខាន់មួយ ក្នុងការពង្រឹងទំនាក់ទំនងសេដ្ឋកិច្ច និងការវិនិយោគរវាងអាស៊ាន និងចិន ខណៈខេត្តតាកែវកំពុងត្រៀមខ្លួនក្លាយជាគោលដៅវិនិយោគថ្មីមួយដែលមានសក្តានុពលខ្ពស់ក្នុងតំបន់៕