រដ្ឋពង្រីកវិនិយោគវិស័យទឹកស្អាត៖ ផ្តោតតំបន់តម្រូវការខ្ពស់ បង្កើនសមត្ថភាពផ្គត់ផ្គង់ និងជំរុញអភិវឌ្ឍន៍ប្រកបដោយនិរន្តរភាព

(ស្វាយរៀង)៖ ឯកឧត្តម ហែម វណ្ណឌី បានបញ្ជាក់ថា ក្រសួងបានកំណត់អាទិភាពវិនិយោគក្នុងវិស័យទឹកស្អាត ដោយផ្តោតទៅលើតំបន់ដែលនៅសេសសល់ក្នុងដែនសេវារបស់រដ្ឋាករទឹក សំដៅពង្រីកសមត្ថភាពផ្គត់ផ្គង់ឱ្យបានពេញលេញ និងលើកកម្ពស់តួនាទីជាយុទ្ធសាស្រ្តរបស់រដ្ឋក្នុងការធានាការចូលដំណើរការទឹកស្អាតជាសកល។

ការបញ្ជាក់នេះ ធ្វើឡើងនាថ្ងៃទី២៦ ខែមីនា ឆ្នាំ២០២៦ ក្នុងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតអណ្តូងតាសី ក្រុងស្វាយរៀង និងពិធីបើកការដ្ឋានគម្រោងពង្រីកហេដ្ឋារចនាសម្ព័ន្ធទឹកស្អាតបន្ថែម សម្រាប់ខេត្តចំនួន៥ ក្រោមអធិបតីភាពដ៏ខ្ពង់ខ្ពស់របស់ ហ៊ុន ម៉ាណែត។

ឯកឧត្តមរដ្ឋមន្ត្រីបានបញ្ជាក់ថា ការផ្តល់អាទិភាពត្រូវបានផ្ដោតលើតំបន់ដែលមានសក្ដានុពល និងតម្រូវការប្រើប្រាស់ទឹកខ្ពស់ ជាពិសេសតំបន់ឧស្សាហកម្ម តំបន់កសិ-ឧស្សាហកម្ម និងតំបន់ខ្វះប្រភពទឹកគ្រប់គ្រាន់ ដូចជា ខេត្តស្វាយរៀង បាត់ដំបង កំពង់ចាម កំពង់ស្ពឺ បន្ទាយមានជ័យ កំពត និងព្រះសីហនុ។ ការវិនិយោគនេះ មានគោលបំណងធានាថា នៅពេលហេដ្ឋារចនាសម្ព័ន្ធត្រូវបានបញ្ចប់ អង្គភាពរដ្ឋាករទឹកអាចបង្កើនចំណូល ពង្រីកសមត្ថភាពវិនិយោគបន្ថែម និងគាំទ្រតំបន់ដែលមានសក្ដានុពលទាប ឬមិនទាន់អភិវឌ្ឍ។

ពាក់ព័ន្ធនឹងគម្រោងអភិវឌ្ឍន៍ទឹកស្អាតទីប្រជុំជនប្រកបដោយនិរន្តរភាព ក្រសួងបានទទួលហិរញ្ញប្បទានឥតសំណងប្រមាណ ៣.៦ លានដុល្លារអាមេរិក ពី ធនាគារវិនិយោគហេដ្ឋារចនាសម្ព័ន្ធអាស៊ី ដើម្បីសិក្សាសមិទ្ធិលទ្ធភាពនៅខេត្តស្វាយរៀង កំពត និងត្បូងឃ្មុំ។ បច្ចុប្បន្ន គម្រោងកំពុងស្ថិតក្នុងដំណាក់កាលសិក្សាបឋម ដោយមានផែនការសំខាន់ៗសម្រាប់ខេត្តស្វាយរៀង រួមមាន៖*ការសាងសង់រោងចក្រប្រព្រឹត្តកម្មទឹកស្អាតសមត្ថភាពប្រមាណ ៥០,០០០ ម៉ែត្រគូបក្នុងមួយថ្ងៃ ផ្គត់ផ្គង់ទៅឃុំកំពង់ចក ឃុំកណ្តៀងរាយ ឃុំក្រោលគោ និងផ្គត់ផ្គង់ទឹកដុំទៅប្រតិបត្តិករឯកជន និងតំបន់សេដ្ឋកិច្ចពិសេស ក្នុងស្រុកកំពង់រោទិ៍ ស្វាយទាប ចន្ទ្រា និងក្រុងបាវិត។ *ការសាងសង់រោងចក្របន្ថែមសមត្ថភាពប្រមាណ ២០,០០០ ម៉ែត្រគូបក្នុងមួយថ្ងៃ ដើម្បីផ្គត់ផ្គង់ទឹកដុំទៅប្រតិបត្តិករទឹកស្អាតនៅស្រុកស្វាយជ្រំ រំដួល និងរមាសហែក។

ជាមួយគ្នានេះ ឯកឧត្តមបានបង្ហាញពីវឌ្ឍនភាពគួរឱ្យកត់សម្គាល់ក្នុងវិស័យទឹកស្អាតទូទាំងប្រទេស ដោយបញ្ជាក់ថា ការផ្គត់ផ្គង់ទឹកស្អាតបានកើនឡើងប្រមាណ ៨០% ពី ៣០៩ លានម៉ែត្រគូបក្នុងឆ្នាំ២០១៨ ដល់ ៥៥៦ លានម៉ែត្រគូបក្នុងឆ្នាំ២០២៥ ខណៈចំនួនគ្រួសារទទួលបានទឹកស្អាតតាមបណ្តាញ ក៏បានកើនឡើងទ្វេដងពីជិត ៧៨ម៉ឺនគ្រួសារ ទៅជាង ១.៥លានគ្រួសារ។

ការពង្រីកវិនិយោគ និងការកសាងហេដ្ឋារចនាសម្ព័ន្ធទឹកស្អាតនេះ ត្រូវបានមើលឃើញថា ជាជំហានយុទ្ធសាស្ត្រសំខាន់មួយ ក្នុងការគាំទ្រកំណើនសេដ្ឋកិច្ច ការអភិវឌ្ឍឧស្សាហកម្ម និងការលើកកម្ពស់គុណភាពជីវិតប្រជាពលរដ្ឋនៅទូទាំងប្រទេស៕