«ស្មារតីនៅជាមួយជាតិ»៖ ទិសដៅកែទម្រង់រដ្ឋបាលសាធារណៈ ឆ្ពោះទៅប្រសិទ្ធភាព និងជំនឿទុកចិត្តពីប្រជាពលរដ្ឋ

(ភ្នំពេញ)៖ ក្នុងបរិបទពិភពលោកកំពុងផ្លាស់ប្ដូរយ៉ាងលឿន និងស្មុគស្មាញឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បានលើកឡើងសារ​ដ៏មានន័យថា «ស្មារតីនៅជាមួយជាតិ កងកម្លាំង និងជនភៀសសឹក គ្រប់វេលា» ដែលបង្ហាញពីទិសដៅនយោបាយ និងការប្តេជ្ញាចិត្តក្នុងការកសាងស្ថាប័នរដ្ឋឲ្យរឹងមាំ និងមានប្រសិទ្ធភាព។

ក្នុងរយៈពេល២ឆ្នាំកន្លះកន្លងមក ក្រសួងមុខងារសាធារណៈ ក្នុងតួនាទីជាសេនាធិការសំខាន់របស់រាជរដ្ឋាភិបាល នីតិកាលទី៧ បានជំរុញការកែទម្រង់ជាបន្តបន្ទាប់ ទោះបីប្រឈមបញ្ហាច្រើនទាំងក្នុង និងក្រៅប្រទេសក៏ដោយ។ សមិទ្ធផលទាំងនេះកើតចេញពីកិច្ចសហការរវាងថ្នាក់ដឹកនាំ មន្ត្រីគ្រប់ជាន់ថ្នាក់ និងការគាំទ្រពីដៃគូជាតិ និងអន្តរជាតិ។

ជាមួយនឹងការតម្រង់ទិសពី សម្ដេចធិបតី ហ៊ុន ម៉ាណែត នាយករដ្ឋមន្ត្រី ការកែទម្រង់រដ្ឋបាលសាធារណៈត្រូវបានលើកកម្ពស់ជាអាទិភាពសំខាន់ ដែលត្រូវបានចាត់ទុកថាជា “បេះដូង” នៃការកែលម្អប្រសិទ្ធភាពរដ្ឋាភិបាល។ ខណៈដែលទស្សនវិជ្ជារបស់សម្ដេចតេជោ ហ៊ុន សែន «កែទម្រង់-រស់, មិនកែទម្រង់-ស្លាប់» នៅតែជាគោលការណ៍ដឹកនាំសំខាន់ សម្រាប់ការបន្តដំណើរការកែទម្រង់។

ឯកឧត្ដមឧបនាយករដ្ឋមន្ត្រីបានបញ្ជាក់ថា ប្រព័ន្ធរដ្ឋបាលសាធារណៈ មិនមែនត្រឹមជាការគ្រប់គ្រងការងាររដ្ឋប៉ុណ្ណោះទេ ប៉ុន្តែជាគន្លងសំខាន់សម្រាប់ការអភិវឌ្ឍជាតិ និងការបង្កើនសមត្ថភាពប្រកួតប្រជែងរបស់កម្ពុជា នៅលើឆាកអន្តរជាតិ។

ក្នុងបរិការណ៍ដែលឆ្នាំ២០២៥ ត្រូវបានចាត់ទុកជាចំណុចរបត់សំខាន់ ឯកឧត្ដមរដ្ឋមន្ត្រី ហ៊ុន ម៉ានី បានអំពាវនាវឲ្យមានស្មារតីរួម និងការខិតខំដោយខ្លួនឯង ដើម្បីឆ្លើយតបនឹងភាពមិនប្រាកដប្រជា និងសម្រេចគោលដៅអភិវឌ្ឍវែងឆ្ងាយរហូតដល់ឆ្នាំ២០៥០។

យ៉ាងណាក៏ដោយ សង្គមក៏កំពុងរំពឹងថា ការកែទម្រង់ទាំងនេះ នឹងអាចបម្លែងទៅជាលទ្ធផលជាក់ស្តែង ដោយផ្តោតលើការកាត់បន្ថយនីតិវិធីស្មុគស្មាញ បង្កើនប្រសិទ្ធភាពសេវាសាធារណៈ និងពង្រឹងជំនឿទុកចិត្តរបស់ប្រជាពលរដ្ឋ។

ក្នុងន័យនេះ សារ «ស្មារតីនៅជាមួយជាតិ» មិនមែនជាពាក្យស្លោកតែប៉ុណ្ណោះទេ ប៉ុន្តែជាការប្តេជ្ញាចិត្តដែលត្រូវបង្ហាញតាមសកម្មភាពជាក់ស្តែង ដើម្បីធានាថា ការកែទម្រង់មានន័យ និងមានប្រសិទ្ធភាពពិតប្រាកដ សម្រាប់អនាគតកម្ពុជា៕