កុំលេងយប់ កុំប៉ះពាល់គ្រឿងញៀន និងគោរពវិន័យឱ្យម៉ឺងម៉ាត់! មេបញ្ជាការអាវុធហត្ថកំពង់ស្ពឺផ្តាំផ្ញើដល់កម្លាំង៧២នាក់!

(កំពង់ស្ពឺ)៖ កម្លាំងយោធិនចំនួន៧២នាក់ នៃកងអនុសេនាធំចល័ត (វគ្គ៤៦ និងវគ្គ៤៧) ត្រូវបានទទួលឯកសណ្ឋានប្រតិបត្តិការ និងទទួលការណែនាំផ្ទាល់ពីថ្នាក់ដឹកនាំ ក្នុងពិធីជួបសំណេះសំណាលមួយ ដែលប្រព្រឹត្តទៅនៅថ្ងៃទី២៦ ខែមីនា ឆ្នាំ២០២៦ ក្នុងសាលប្រជុំបញ្ជាការដ្ឋានកងរាជអាវុធហត្ថខេត្តកំពង់ស្ពឺ។

ពិធីនេះ ត្រូវបានអញ្ជើញជាអធិបតីដោយលោកឧត្ដមសេនីយ៍ត្រី ម៉េង ស្រ៊ុន ដែលបានអញ្ជើញផ្ទាល់ក្នុងការកាត់ឯកសណ្ឋាន និងផ្តល់អនុសាសន៍ដល់កម្លាំង ក្នុងគោលបំណងពង្រឹងសមត្ថភាព និងវិន័យក្នុងអង្គភាព។

ក្នុងឱកាសនោះ លោកឧត្ដមសេនីយ៍ត្រី ម៉េង ស្រ៊ុន មេបញ្ជាការអាវុធហត្ថកំពង់ស្ពឺបានលើកឡើងពីចំណុចខ្វះខាតមួយចំនួនដែលកងកម្លាំងធ្លាប់ប្រឈមកន្លងមក ប៉ុន្តែបានសរសើរថា នាយទាហានរងភាគច្រើន បានខិតខំបំពេញភារកិច្ចជូនអង្គភាពបានយ៉ាងសកម្ម។ លោកបានបញ្ជាក់ថា ការងារប្រចាំថ្ងៃ គឺជាបទពិសោធន៍ និងមេរៀនសំខាន់សម្រាប់កម្លាំងថ្មីៗ ដើម្បីអភិវឌ្ឍខ្លួនឱ្យកាន់តែប្រសើរ។

ជាមួយគ្នានេះ លោកមេបញ្ជាការបានផ្តាំផ្ញើដោយសង្កត់ធ្ងន់លើវិន័យ និងសីលធម៌ការងារ ដោយណែនាំឱ្យនាយទាហានទាំងអស់ បន្តខិតខំរៀនសូត្រ ពង្រឹងសមត្ថភាព និងគោរពបទបញ្ជាឱ្យបានម៉ឺងម៉ាត់។ លោកក៏បានរំលឹកឱ្យជៀសវាងអំពើអវិជ្ជមាន ដូចជាការប្រើប្រាស់គ្រឿងស្រវឹងលើសកម្រិត ការដើរលេងយប់ដោយគ្មានការអនុញ្ញាត ការប្រើប្រាស់បណ្តាញសង្គមដោយគ្មានការទទួលខុសត្រូវ និងជាពិសេស ត្រូវឆ្ងាយពីគ្រឿងញៀន។

លើសពីនេះ លោកឧត្ដមសេនីយ៍បានលើកទឹកចិត្តឱ្យកងកម្លាំងទាំងអស់ គោរព និងស្រលាញ់គ្នា បង្កើនសាមគ្គីភាពផ្ទៃក្នុងអង្គភាព ដើម្បីធានាបាននូវប្រសិទ្ធភាពក្នុងការអនុវត្តភារកិច្ច និងការរក្សាសន្តិសុខសង្គម។

នៅក្នុងពិធីនេះ លោកឧត្ដមសេនីយ៍ត្រី ម៉េង ស្រ៊ុន ក៏បានជូនពរដល់នាយទាហានទាំងអស់ និងក្រុមគ្រួសារ សូមឱ្យមានសុខភាពល្អ ជោគជ័យក្នុងភារកិច្ច និងបន្តបម្រើជាតិជាអនិរន្តរ៍។

ពិធីនេះ ត្រូវបានចាត់ទុកថា ជាជំហានសំខាន់មួយ ក្នុងការពង្រឹងវិន័យ ការអប់រំសីលធម៌ និងការរៀបចំកម្លាំងមនុស្សធនធាន ឱ្យមានគុណភាព សមស្របនឹងតម្រូវការការពារសន្តិសុខ និងសណ្ដាប់ធ្នាប់សង្គមនៅមូលដ្ឋាន៕