ឯកឧត្តម ទេព អស្នារិទ្ធ៖ អ្នកសារព័ត៌មានត្រូវធ្វើការងារដោយបញ្ញា បេះដូង និងវិជ្ជាជីវៈពិតប្រាកដ

(ភ្នំពេញ)៖ ក្រសួងព័ត៌មានកំពុងជំរុញការរៀបចំគោលការណ៍ណែនាំស្តីពីការរាយការណ៍ព័ត៌មាន ដោយមានគោលបំណងតម្រង់ទិសឱ្យអ្នកសារព័ត៌មានអនុវត្តការងារប្រកបដោយវិជ្ជាជីវៈខ្ពស់ និងការទទួលខុសត្រូវ ជាពិសេសពាក់ព័ន្ធនឹងការផ្សាយព័ត៌មាន ឬផលិតមាតិកាក្នុងសម័យឌីជីថល ដែលប៉ះពាល់ដល់សិទ្ធិ និងសេចក្តីថ្លៃថ្នូររបស់ស្ត្រី កុមារ និងជនងាយរងគ្រោះ។

ការលើកឡើងនេះ ត្រូវបានបញ្ជាក់ដោយឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន ក្នុងឱកាសដឹកនាំកិច្ចប្រជុំមួយ កាលពីរសៀលថ្ងៃទី២៥ ខែមីនា ឆ្នាំ២០២៦ នៅទីស្តីការក្រសួងព័ត៌មាន ដើម្បីពិនិត្យវឌ្ឍនៈភាពនៃការតាក់តែងគោលការណ៍ណែនាំខាងលើ។

កិច្ចប្រជុំបានប្រមូលផ្តុំការចូលរួមពីថ្នាក់ដឹកនាំនានានៃក្រសួងព័ត៌មាន មន្ត្រីជំនាញនៃអគ្គនាយកដ្ឋានព័ត៌មាន និងសោតទស្សន៍ ព្រមទាំងតំណាង និងអ្នកជំនាញពីអង្គការអន្តរជាតិដៃគូសំខាន់ៗ ដូចជា Plan International Cambodia, Save the Children Cambodia, World Vision International, UNICEF Cambodia និង CARE ដែលបានចូលរួមផ្តល់មតិយោបល់ និងបទពិសោធន៍ជាក់ស្តែង។

ឯកឧត្តមបានបញ្ជាក់ថា ការរៀបចំគោលការណ៍ណែនាំនេះ បានផ្អែកលើមូលដ្ឋានច្បាប់សំខាន់ៗ រួមមានរដ្ឋធម្មនុញ្ញ ច្បាប់ស្តីពីរបបសារព័ត៌មាន ធម្មនុញ្ញវិជ្ជាជីវៈសារព័ត៌មាន និងលិខិតបទដ្ឋានជាតិ និងអន្តរជាតិពាក់ព័ន្ធ ដែលត្រូវបានក្រុមការងារចម្រុះយកមកធ្វើជាគ្រឹះក្នុងការតាក់តែង។

ក្នុងដំណើរការនេះ ក្រុមការងាររួមរវាងក្រសួងព័ត៌មាន និងដៃគូអន្តរជាតិ បានរៀបចំកិច្ចប្រជុំ និងពិភាក្សាជាបន្តបន្ទាប់ ដើម្បីប្រមូលធាតុចូលសំខាន់ៗ ដែលឆ្លើយតបទៅនឹងបរិបទជាក់ស្តែងនៅកម្ពុជា ជាពិសេសការការពារ និងលើកកម្ពស់សិទ្ធិស្ត្រី កុមារ និងជនងាយរងគ្រោះក្នុងការផ្សព្វផ្សាយព័ត៌មាន។

ឯកឧត្តម ទេព អស្នារិទ្ធ បានរំលេចថា បន្ទាប់ពីរៀបចំរួច គោលការណ៍ណែនាំនេះ នឹងក្លាយជាឧបករណ៍ស្តង់ដារសំខាន់មួយសម្រាប់អ្នកសារព័ត៌មាន ក្នុងការអនុវត្តការងារប្រចាំថ្ងៃ ដើម្បីធានាថា ការរាយការណ៍ព័ត៌មានមានភាពត្រឹមត្រូវ សុក្រឹត និងមានទំនួលខុសត្រូវខ្ពស់ ជាពិសេសពាក់ព័ន្ធនឹងប្រធានបទងាយរងគ្រោះ។

ការរៀបចំលិខិតបទដ្ឋានគតិយុត្តនេះ ក៏ត្រូវបានចាត់ទុកថាជាអាទិភាពមួយក្នុងផែនការយុទ្ធសាស្ត្រនីតិកាលទី៧ របស់ក្រសួងព័ត៌មាន ក្នុងគោលបំណងពង្រឹងសណ្តាប់ធ្នាប់ព័ត៌មាន និងលើកកម្ពស់គុណភាពប្រព័ន្ធផ្សព្វផ្សាយនៅកម្ពុជា។

ឯកឧត្តមបានបន្ថែមថា គំនិតផ្ដួចផ្ដើមនេះ មិនត្រឹមតែជួយពង្រឹងការអនុវត្តច្បាប់នោះទេ ប៉ុន្តែថែមទាំងជាគ្រឹះសម្រាប់លើកកម្ពស់តម្លៃវិជ្ជាជីវៈសារព័ត៌មាន ការគោរពក្រមសីលធម៌ និងការបង្កើនទំនុកចិត្តរបស់សាធារណជនចំពោះការផ្សាយព័ត៌មាន។

ជាមួយគ្នានេះ ការអនុវត្តតាមគោលការណ៍ណែនាំ និងក្រមសីលធម៌យ៉ាងត្រឹមត្រូវ នឹងជួយការពារសុវត្ថិភាពផ្នែកច្បាប់ដល់អ្នកសារព័ត៌មាន ពីការចោទប្រកាន់ ឬវិវាទផ្លូវច្បាប់ដែលអាចកើតមាន។

នៅចុងបញ្ចប់ ឯកឧត្តមអ្នកនាំពាក្យ បានអំពាវនាវដល់អ្នកសារព័ត៌មាន អ្នកផលិតមាតិកា និងអ្នកប្រើប្រាស់បណ្ដាញសង្គមទាំងអស់ ឱ្យគោរពក្រមសីលធម៌ និងសិទ្ធិអ្នកដទៃ ដោយផ្សព្វផ្សាយព័ត៌មានប្រកបដោយការទទួលខុសត្រូវ និងវិជ្ជាជីវៈ។

ឯកឧត្តមបានបញ្ជាក់ថា អ្នកសារព័ត៌មានសម័យថ្មី មិនត្រឹមតែមានជំនាញបច្ចេកទេសប៉ុណ្ណោះទេ ប៉ុន្តែត្រូវមាន “បញ្ញា បេះដូង និងវិជ្ជាជីវៈពិតប្រាកដ” ដើម្បីធានាថា ព័ត៌មានដែលបានផ្សព្វផ្សាយ មានគុណភាព និងបម្រើប្រយោជន៍សាធារណៈយ៉ាងពិតប្រាកដ៕