ពង្រឹងប្រព័ន្ធ HOTLINE! តំណាងស្នងការខេត្តកណ្ដាល លោកឧត្ដមសេនីយ៍ ឡាក់ ម៉េងធី អញ្ជើញចូលរួមកិច្ចប្រជុំបូកសរុបការងារ និងដាក់ចេញទិសដៅថ្មី សម្រាប់សុវត្ថិភាពជនបរទេសនៅកម្ពុជា

(ភ្នំពេញ)៖ នៅព្រឹកថ្ងៃព្រហស្បតិ៍ ទី២៦ ខែមីនា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចាត់លោកឧត្តមសេនីយ៍ត្រី ឡាក់ ម៉េងធី ស្នងការរង និងលោកឧត្តមសេនីយ៍ត្រី តុប សុវណ្ណ ជាតំណាង ចូលរួមកិច្ចប្រជុំប្រចាំខែកុម្ភៈ ឆ្នាំ២០២៦ របស់ក្រុមព័ត៌មានទាន់ហេតុការណ៍ (HOTLINE) ជាមួយជនបរទេស ប្រចាំនៅព្រះរាជាណាចក្រកម្ពុជា។

កិច្ចប្រជុំបានប្រព្រឹត្តទៅក្រោមអធិបតីភាពលោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងដ៏ខ្ពង់ខ្ពស់លោកនាយឧត្តមសេនីយ៍ ស ថេត អគ្គស្នងការនគរបាលជាតិ នៅសាលប្រជុំនៃទីស្តីការ ក្រសួងមហាផ្ទៃ។

កិច្ចប្រជុំដ៏សំខាន់នេះ បានប្រារព្ធឡើងនៅទីស្តីការក្រសួងមហាផ្ទៃ ដោយផ្តោតលើការពិនិត្យវាយតម្លៃលទ្ធផលការងារកន្លងមក និងពង្រឹងប្រសិទ្ធភាពប្រព័ន្ធ HOTLINE ក្នុងការទំនាក់ទំនង និងឆ្លើយតបបញ្ហាផ្សេងៗរបស់ជនបរទេសនៅក្នុងព្រះរាជាណាចក្រកម្ពុជា ឲ្យបានទាន់ពេលវេលា និងមានប្រសិទ្ធភាពខ្ពស់។

ក្នុងកិច្ចប្រជុំនេះ មានការចូលរួមពីលោកឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ និងជាអនុប្រធានក្រុមការងារ HOTLINE ជាមួយជនបរទេស និងលោកឧត្តមសេនីយ៍ឯក អាត់ បូនី អគ្គនាយករងនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ព្រមទាំងថ្នាក់ដឹកនាំនានា រួមមាន ប្រធាន-អនុប្រធាននាយកដ្ឋាន ស្នងការ និងស្នងការរង នៃស្នងការដ្ឋាននគរបាលរាជធានី-ខេត្ត។

ជាពិសេស ក៏មានការចូលរួមពីតំណាងបណ្តាស្ថានទូត ស្ថានកុងស៊ុល និងអង្គការអន្តរជាតិជាច្រើនប្រចាំនៅកម្ពុជា ដែលបានបង្ហាញពីការយកចិត្តទុកដាក់ និងសហការយ៉ាងជិតស្និទ្ធ ក្នុងការធានាសុវត្ថិភាព និងសេវាសាធារណៈសម្រាប់ជនបរទេស។

កិច្ចប្រជុំនេះ ត្រូវបានគេចាត់ទុកថា ជាជំហានសំខាន់មួយក្នុងការពង្រឹងការសម្របសម្រួល ការផ្លាស់ប្តូរព័ត៌មាន និងការឆ្លើយតបបញ្ហាដែលកើតមានចំពោះជនបរទេស ដើម្បីធានាបរិយាកាសសុវត្ថិភាព ស្ថេរភាព និងភាពទាក់ទាញសម្រាប់ការវិនិយោគ និងទេសចរណ៍នៅកម្ពុជាឲ្យកាន់តែប្រសើរឡើង៕