ឧបនាយករដ្ឋមន្ត្រី ហ៊ុន ម៉ានី ដឹកនាំបិទសន្និបាត ក្រសួងមុខងារសាធារណៈ ជំរុញកែទម្រង់ និងលើកគុណភាពសេវាសាធារណៈ

(ភ្នំពេញ)៖ ឯកឧត្ដម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ តំណាងដ៏ខ្ពង់ខ្ពស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ ក្រសួងមុខងារសាធារណៈ នាព្រឹកថ្ងៃទី២៦ ខែមីនា ឆ្នាំ២០២៦។

ក្នុងឱកាសនេះ ឯកឧត្ដម យក់ ប៊ុនណា រដ្ឋលេខាធិការប្រចាំការ បានលើកឡើងថា ទោះបីមានសមិទ្ធផលសំខាន់ៗជាច្រើនក៏ដោយ ក្រសួងនៅតែប្រឈមបញ្ហាមួយចំនួន ដែលទាមទារការយកចិត្តទុកដាក់ និងដំណោះស្រាយជាបន្ត ដោយផ្អែកលើកិច្ចសហការរវាងក្រសួង-ស្ថាប័ន និងការគាំទ្រយ៉ាងមុតមាំពីថ្នាក់ដឹកនាំជាន់ខ្ពស់។

ឯកឧត្តមបានបន្ថែមថា ការធ្វើទំនើបកម្មរដ្ឋបាលសាធារណៈ និងការលើកកម្ពស់គុណភាពសេវាសាធារណៈ កំពុងប្រឈមសម្ពាធពីតម្រូវការសមត្ថភាពមន្រ្តី ពេលវេលា និងធនធានបច្ចេកវិទ្យា ដែលទាមទារការវិនិយោគ និងការអភិវឌ្ឍបន្ថែម។

ជាមួយគ្នានេះ ក្រសួងបានកំណត់ទិសដៅអនុវត្តបន្ត ដោយផ្តោតលើការពង្រឹងមុខងារស្នូល និងជំរុញវិធានការគន្លឹះក្នុងការកែទម្រង់រដ្ឋបាលសាធារណៈ នៃរាជរដ្ឋាភិបាល នីតិកាលទី៧ នៃរដ្ឋសភា ព្រមទាំងអនុវត្តការងារអាទិភាពផ្សេងៗ តាមការណែនាំដ៏ខ្ពង់ខ្ពស់របស់ឯកឧត្តម ហ៊ុន ម៉ានី។

ក្នុងសុន្ទរកថាបិទសន្និបាត ឯកឧត្តម ហ៊ុន ម៉ានី បានមានប្រសាសន៍ថា ក្នុងរយៈពេលជាង ២ឆ្នាំកន្លះ នៃការអនុវត្តកម្មវិធីនយោបាយរបស់រាជរដ្ឋាភិបាល នីតិកាលទី៧ បានសម្រេចសមិទ្ធផលជាច្រើន ទោះបីប្រឈមនឹងបញ្ហាស្មុគស្មាញទាំងក្នុង និងក្រៅប្រទេសក៏ដោយ។

ក្នុងនាមតំណាងដ៏ខ្ពង់ខ្ពស់របស់សម្ដេចធិបតីនាយករដ្ឋមន្ត្រី ហ៊ុន ម៉ាណែត ឯកឧត្តមឧបនាយករដ្ឋមន្ត្រី ក៏បានអបអរសាទរ និងវាយតម្លៃខ្ពស់ចំពោះសមិទ្ធផលការងារដែលថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ សម្រេចបានក្នុងការដឹកនាំ គ្រប់គ្រង និងអភិវឌ្ឍវិស័យមុខងារសាធារណៈ។

ជាពិសេស ការជំរុញអនុវត្តវិធានការគន្លឹះទាំង៣ ក្នុងការកែទម្រង់រដ្ឋបាលសាធារណៈ ត្រូវបានអនុវត្តដោយមានភាពសកម្ម បុរេសកម្ម នវានុវត្តន៍ និងស្មារតីទទួលខុសត្រូវខ្ពស់ ដែលជាមូលដ្ឋានសម្រាប់ការលើកកម្ពស់ប្រសិទ្ធភាព និងគុណភាពសេវាសាធារណៈ ជូនប្រជាពលរដ្ឋកាន់តែល្អប្រសើរ៕