រដ្ឋមន្ត្រីព័ត៌មានដឹកនាំពិភាក្សាគោលនយោបាយធំៗ ប្តេជ្ញាអភិវឌ្ឍទូរទស្សន៍ឌីជីថល និងកែទម្រង់ច្បាប់សារព័ត៌មាន

(ភ្នំពេញ)៖ ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មានបានអញ្ជើញដឹកនាំកិច្ចប្រជុំសំខាន់មួយ ដើម្បីពិនិត្យ និងសម្រេចលើឯកសារក្របខ័ណ្ឌទស្សនាទានគោលនយោបាយជាតិស្តីពីការអភិវឌ្ឍទូរទស្សន៍ឌីជីថល និងក្របខ័ណ្ឌទស្សនាទានសម្រាប់ការរៀបចំឡើងវិញច្បាប់ស្តីពីរបបសារព័ត៌មាន នៅព្រឹកថ្ងៃទី២៦ ខែមីនា ឆ្នាំ២០២៦ នាសាលប្រជុំព្រះវិហារ នៃក្រសួងព័ត៌មាន។

ឯកឧត្តមរដ្ឋមន្ត្រីបានគូសបញ្ជាក់ថា កិច្ចប្រជុំនេះ មានគោលបំណងពិនិត្យ និងពិភាក្សាលើឯកសារសំខាន់ៗ ដែលពាក់ព័ន្ធនឹងការអភិវឌ្ឍវិស័យព័ត៌មាន និងសោតទស្សន៍នៅកម្ពុជា ដើម្បីធានាថា វិស័យនេះមានភាពទំនើប មានគុណភាព និងមានការទទួលខុសត្រូវខ្ពស់ ក្នុងការផ្តល់ព័ត៌មានត្រឹមត្រូវ ទាន់ពេលវេលា និងអាចទុកចិត្តបានជូនប្រជាពលរដ្ឋ។

ឯកឧត្តមបានបន្ថែមថា ការរៀបចំគោលនយោបាយជាតិស្តីពីការអភិវឌ្ឍទូរទស្សន៍ឌីជីថល និងការកែទម្រង់ច្បាប់សារព័ត៌មាន ត្រូវអនុវត្តដោយផ្អែកលើមូលដ្ឋានវិទ្យាសាស្ត្រ ភូមិសាស្ត្រ បរិបទជាក់ស្តែង ព្រមទាំងយកចិត្តទុកដាក់លើប្រវត្តិ បញ្ហាប្រឈម និងតម្រូវការអភិវឌ្ឍជាតិ ដើម្បីធានាផលប្រយោជន៍រួមរបស់ប្រជាជន និងប្រទេសជាតិ។

ក្នុងកិច្ចប្រជុំ ឯកឧត្ដម ប្រាក់ ថាវអមិដា អនុរដ្ឋលេខាធិការ និងអនុប្រធានក្រុមការងារបច្ចេកទេសបានធ្វើរបាយការណ៍សង្ខេបពីដំណើរការអនុវត្តគម្រោងប្រព័ន្ធលើកទឹកចិត្តគាំទ្រសមិទ្ធកម្ម ក្នុងរដ្ឋបាលសាធារណៈ និងការរៀបចំឯកសារទស្សនាទានទាំងពីរ។

ខណៈដែល លោក សាន ពុទ្ធារី ប្រធាននាយកដ្ឋានសោតទស្សន៍បានបង្ហាញលម្អិតអំពីឯកសារក្របខ័ណ្ឌទស្សនាទានស្តីពីការអភិវឌ្ឍទូរទស្សន៍ឌីជីថល ដោយបញ្ជាក់ថា ការវិវត្តនៃបច្ចេកវិទ្យាឌីជីថល និងបញ្ញាសិប្បនិម្មិត កំពុងក្លាយជាកម្លាំងចលករសំខាន់ ជំរុញការរីកចម្រើនលើវិស័យផ្សព្វផ្សាយ សេដ្ឋកិច្ច និងសង្គមឌីជីថល។

លោកបានបន្ថែមថា ការផ្លាស់ប្តូរពីប្រព័ន្ធផ្សាយអាណាឡូកទៅឌីជីថល នឹងជួយបង្កើនប្រសិទ្ធភាព គុណភាព និងល្បឿននៃការផ្សាយមាតិកា ព្រមទាំងធានាសិទ្ធិទទួលព័ត៌មានរបស់ប្រជាពលរដ្ឋ និងលើកកម្ពស់ការចូលរួមពីវិស័យឯកជនក្នុងអាជីវកម្មប្រព័ន្ធផ្សព្វផ្សាយ។

ការអភិវឌ្ឍទូរទស្សន៍ឌីជីថល ត្រូវបានចាត់ទុកថា មិនត្រឹមតែជាការកែលម្អបច្ចេកវិទ្យាប៉ុណ្ណោះទេ ប៉ុន្តែជាចំណុចស្នូលសម្រាប់ការឆ្លើយតបទៅនឹងតម្រូវការអភិវឌ្ឍជាតិ និងការពង្រឹងតួនាទីប្រព័ន្ធផ្សព្វផ្សាយ ក្នុងការនាំយកព័ត៌មានទៅដល់ប្រជាពលរដ្ឋយ៉ាងទូលំទូលាយ និងទាន់សម័យ ដោយផ្អែកលើគោលការណ៍ «ថ្មី ពិត លឿន ទូលំទូលាយ ប្រកបដោយជំនឿទុកចិត្ត និងវិជ្ជាជីវៈ»៕