ចាប់បានហើយ! ក្រុមចោរធាក់ប្លន់ម៉ូតូ នៅអង្គស្នួល មិនរួចខ្លួនទេ!

(កណ្ដាល)៖ ក្រោមការអនុវត្តតាមបទបញ្ជាដ៏តឹងរ៉ឹងរបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល កម្លាំងជំនាញខេត្តសហការជាមួយអធិការដ្ឋាននគរបាលស្រុកអង្គស្នួល និងកម្លាំងខេត្តកំពង់ស្ពឺបានបើកប្រតិបត្តិការស្រាវជ្រាវយ៉ាងសកម្ម រហូតឈានដល់ការបង្រ្កាប និងឃាត់ខ្លួនជនសង្ស័យបាន៤នាក់ ក្នុងករណីធាក់ប្លន់ម៉ូតូយ៉ាងព្រៃផ្សៃ។

ហេតុការណ៍នេះ បានកើតឡើងនៅវេលាម៉ោង ០៥:៤០នាទីព្រឹកថ្ងៃទី២៣ ខែមីនា ឆ្នាំ២០២៦ នៅចំណុចផ្លូវកៅស៊ូ ភូមិស្វាយឧត្តម ឃុំសំរោងលើ ស្រុកអង្គស្នួល ខេត្តកណ្តាល។

ជនរងគ្រោះជាយុវជនវ័យ១៩ឆ្នាំ មុខរបរជាងម៉ាស៊ីន ត្រូវក្រុមជនសង្ស័យធ្វើសកម្មភាពធាក់ប្លន់យកម៉ូតូ Dream C125 ស៊េរី២០២២ មួយគ្រឿង។

តាមការស្រាវជ្រាវ សមត្ថកិច្ចបានកំណត់មុខសញ្ញាជនសង្ស័យចំនួន៥នាក់ ឃាត់ខ្លួនបាន៤នាក់ និងគេចខ្លួន១នាក់ ក្នុងនោះមានទាំងមេក្លោង និងបក្ខពួក ដែលសុទ្ធតែជាយុវជនវ័យក្មេង។

ជនសង្ស័យបានសារភាពថា មុនពេលធ្វើសកម្មភាព ពួកគេបានណាត់ជួបផឹកស៊ីជុំគ្នាជាមុន ហើយបន្ទាប់មកបានរៀបចំផែនការ ធ្វើសកម្មភាពប្លន់តែម្ដង។

វត្ថុតាងដែលសមត្ថកិច្ចដកហូតបាន រួមមាន៖ ម៉ូតូ Dream C125 ចំនួន២គ្រឿង និងទូរសព្ទដៃ៣គ្រឿង (iPhone ២គ្រឿង និង Samsung ១គ្រឿង)។

បច្ចុប្បន្នសមត្ថកិច្ចកំពុងបន្តស្វែងរកជនសង្ស័យដែលនៅសល់ និងកសាងសំណុំរឿង ដើម្បីចាត់ការតាមនីតិវិធីច្បាប់យ៉ាងតឹងរ៉ឹង។

គួររំលឹកថា ក្រុមជនល្មើស មិនថាវ័យក្មេង ឬចាស់ បើហ៊ានប្រព្រឹត្តបទល្មើស នឹងមិនអាចគេចផុតពីច្បាប់បានឡើយ៕