ឧបនាយករដ្ឋមន្ត្រី កើត រិទ្ធ៖ កំណែទម្រង់ច្បាប់ និងប្រព័ន្ធយុត្តិធម៌ គឺជាអាទិភាពស្នូលក្នុងការពង្រឹង “នីតិរដ្ឋ”

(ភ្នំពេញ)៖ ក្រសួងយុត្តិធម៌បានបង្ហាញការប្តេជ្ញាចិត្តបន្តជំរុញកំណែទម្រង់វិស័យយុត្តិធម៌ ដោយយកការវាយតម្លៃលទ្ធផលការងារឆ្នាំ២០២៥ ជាមូលដ្ឋានសំខាន់ក្នុងការកំណត់ទិសដៅអាទិភាពសម្រាប់ឆ្នាំ២០២៦ ដើម្បីលើកកម្ពស់គុណភាព និងប្រសិទ្ធភាពនៃការអនុវត្តច្បាប់នៅកម្ពុជា។

ថ្លែងក្នុងសន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៥ និងដាក់ចេញទិសដៅឆ្នាំ២០២៦ នាព្រឹកថ្ងៃទី២៥ ខែមីនា ឆ្នាំ២០២៦ ឯកឧត្តមឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ បានគូសបញ្ជាក់ថា កំណែទម្រង់ច្បាប់ និងប្រព័ន្ធយុត្តិធម៌ គឺជាអាទិភាពស្នូលក្នុងការពង្រឹង “នីតិរដ្ឋ” ដែលជាគ្រឹះសម្រាប់ធានាស្ថិរភាពសង្គម សន្តិសុខ និងសណ្តាប់ធ្នាប់សាធារណៈ ព្រមទាំងជំរុញការអភិវឌ្ឍជាតិឱ្យមានចីរភាព។

ឯកឧត្តមបានបន្ថែមថា ក្រសួងកំពុងដាក់ចេញយន្តការសំខាន់ៗ រួមមាន ការបង្កើតប្រព័ន្ធដោះស្រាយវិវាទក្រៅតុលាការ ការពន្លឿននីតិវិធីដោះស្រាយសំណុំរឿងនៅតុលាការ និងការត្រួតពិនិត្យដោះស្រាយភាពមិនប្រក្រតីក្នុងប្រព័ន្ធយុត្តិធម៌ ដើម្បីធានាឱ្យមានភាពត្រឹមត្រូវ តម្លាភាព និងទុកចិត្តបានពីសាធារណជន។

ជាមួយគ្នានេះ រដ្ឋមន្ត្រីក្រសួងយុត្តិធម៌បានជំរុញឱ្យមន្រ្តីពាក់ព័ន្ធ ជាពិសេសចៅក្រម និងព្រះរាជអាជ្ញា ត្រូវពន្លឿនការដោះស្រាយសំណុំរឿងឱ្យបានទាន់ពេលវេលា និងប្រកាន់ខ្ជាប់នូវក្រមសីលធម៌វិជ្ជាជីវៈយ៉ាងតឹងរឹង ដើម្បីរក្សាភាពយុត្តិធម៌ និងជៀសវាងបញ្ហាវិន័យ។

ក្នុងឱកាសដូចគ្នានេះ ឯកឧត្តមបណ្ឌិត ជីវ កេង ប្រធានតុលាការកំពូល បានលើកឡើងពីសារៈសំខាន់នៃការត្រួតពិនិត្យ និងវាយតម្លៃស្ថានភាពវិស័យយុត្តិធម៌ ដើម្បីស្វែងរកបញ្ហាប្រឈមជាក់ស្តែង ទាំងផ្នែកអនុវត្តច្បាប់ និងការបំពេញការងាររបស់មន្រ្តីយុត្តិធម៌។ ឯកឧត្តមក៏បានអំពាវនាវឱ្យចៅក្រម និងព្រះរាជអាជ្ញា រក្សាគោលការណ៍វិជ្ជាជីវៈ និងក្រមសីលធម៌ ឱ្យបានម៉ឺងម៉ាត់ ដើម្បីជៀសវាងការប៉ះពាល់ដល់កិត្តិយស និងទំនុកចិត្តសាធារណៈ។

គួរបញ្ជាក់ថា សន្និបាតវិស័យយុត្តិធម៌នេះ ត្រូវបានរៀបចំរយៈពេល២ថ្ងៃ ចាប់ពីថ្ងៃទី២៥ ដល់ថ្ងៃទី២៦ ខែមីនា ឆ្នាំ២០២៦ ក្នុងគោលបំណងពិនិត្យ តាមដាន និងវាយតម្លៃការអនុវត្តផែនការសកម្មភាពកន្លងមក ដើម្បីកំណត់បញ្ហាប្រឈម និងដាក់ចេញទិសដៅអាទិភាពថ្មី សម្រាប់លើកកម្ពស់ប្រសិទ្ធភាពនៃការអនុវត្តច្បាប់ និងការកែទម្រង់ប្រព័ន្ធយុត្តិធម៌នៅកម្ពុជាបន្តទៅមុខ៕ ប្រភព៖ ក្រសួងព័ត៌មាន, ដោយ៖ មករា AKP