បង្ក្រាប Online Scam ៤ទីតាំងក្នុងបុរីអ័រគីដេ ចាប់ខ្លួនជនជាតិចិន ១៥នាក់ កណ្ដាលរាជធានីភ្នំពេញ

(ភ្នំពេញ)៖ បទល្មើសឆបោកតាមប្រព័ន្ធបច្ចេកវិទ្យា នៅតែជាចំណុចក្តៅដែលអាជ្ញាធរមិនអនុញ្ញាតឱ្យដង្ហើមឡើងវិញ ខណៈកម្លាំងចម្រុះនៃគណៈបញ្ជាការឯកភាពរដ្ឋបាលរាជធានីភ្នំពេញ បានបើកប្រតិបត្តិការបង្ក្រាបជាបន្តបន្ទាប់ ដោយចុះវាយលុកទីតាំងសង្ស័យចំនួន ៤ ករណីផ្សេងគ្នា នៅក្នុងបុរីអ័រគីដេ កាលពីថ្ងៃទី២៤ ខែមីនា ឆ្នាំ២០២៦។

ប្រតិបត្តិការនេះ មិនមែនជាការត្រួតពិនិត្យធម្មតាទេ ប៉ុន្តែជាការបង្ហាញពីឆន្ទៈរឹងមាំរបស់អាជ្ញាធរ ក្នុងការបំបាត់ “សំបុកឆបោក” ដែលកំពុងលាក់ខ្លួនក្រោមសំបកលំនៅឋានឯកជន។ ជាលទ្ធផល សមត្ថកិច្ចបានឃាត់ខ្លួនជនសង្ស័យជាជនជាតិចិនសរុប ១៥នាក់ ព្រមទាំងដកហូតវត្ថុតាងជាច្រើន រួមមានទូរសព្ទដៃ ៤៣គ្រឿង កុំព្យូទ័រយួរដៃ ៥គ្រឿង រថយន្តម៉ាក GAC GN8 មួយគ្រឿង និងសារធាតុញៀនសង្ស័យ១កញ្ចប់។

ការចុះបង្ក្រាបនេះ ត្រូវបានអនុវត្តក្រោមការបញ្ជាដោយផ្ទាល់ពីឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តមឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ ដោយមានការចូលរួមពីអាជ្ញាធរខណ្ឌជ្រោយចង្វា និងសម្របសម្រួលផ្លូវច្បាប់ដោយលោក ទិន សុចិត្រា ព្រះរាជអាជ្ញារង។

ជាមួយគ្នានេះ អាជ្ញាធរបានសម្រេចបិទឃ្លុំជាបណ្តោះអាសន្នផ្ទះចំនួន២កន្លែង ដែលជាគោលដៅប្រព្រឹត្តបទល្មើស ដើម្បីទប់ស្កាត់ការបន្តសកម្មភាពខុសច្បាប់ និងកាត់ផ្តាច់បណ្តាញឆបោកឲ្យបានឆាប់រហ័ស។

អ្វីដែលគួរឲ្យចាប់អារម្មណ៍នោះគឺ ប្រតិបត្តិការនេះគ្រាន់តែជាចំណែកតូចមួយប៉ុណ្ណោះ ក្នុងយុទ្ធនាការធំទូលាយរបស់អាជ្ញាធរដើម្បីសម្អាតបណ្ដាញឆបោកឌីជីថល។ តាមទិន្នន័យរបស់លេខាធិការដ្ឋាន គ.ប.ឆ.ប. ចាប់ពីឆ្នាំ២០២៥ ដល់សប្តាហ៍ទី២ ខែមីនា ឆ្នាំ២០២៦ សមត្ថកិច្ចបានបង្ក្រាប និងបិទសកម្មភាពទីតាំងពាក់ព័ន្ធ Online Scam សរុបដល់ ២៣៦ ទីតាំងទូទាំងប្រទេស។

បន្ថែមពីនេះ របាយការណ៍ក្រសួងយុត្តិធម៌បង្ហាញថា ក្នុងរយៈពេលត្រឹម ៨ ខែចុងក្រោយ តុលាការកម្ពុជាបានដំណើរការសំណុំរឿងពាក់ព័ន្ធឆបោកអនឡាញចំនួន ៧៩ករណី ដោយពាក់ព័ន្ធមនុស្សរហូតដល់ ៦៩៧នាក់ ពីជាតិភាគច្រើនទូទាំងតំបន់ និងអន្តរជាតិ។ ទោះជាយ៉ាងណា អាជ្ញាធរបានកត់សម្គាល់ថា មេខ្លោងជាច្រើនបានគេចខ្លួនចេញពីប្រទេស បង្កើតជាបញ្ហាបន្តសម្រាប់ការតាមចាប់ខ្លួន។

នៅក្នុងបរិបទនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់យ៉ាងច្បាស់ថា កម្ពុជាមិនមែនជាទីជំរកសម្រាប់ឧក្រិដ្ឋជនបច្ចេកវិទ្យាឡើយ ហើយបានប្ដេជ្ញាបោសសម្អាតបទល្មើសប្រភេទនេះឲ្យបានស្អាតស្អំ នៅមុនខែមេសា ឆ្នាំ២០២៦។

សារដ៏តឹងរឹងនេះ បង្ហាញថា សង្រ្គាមប្រឆាំង Online Scam មិនត្រឹមតែបន្តទេ ប៉ុន្តែកំពុងឈានទៅរកដំណាក់កាល “បញ្ចប់” ដោយគ្មានការយោគយល់ចំពោះមេខ្លោង និងបក្ខពួកណាមួយឡើយ៕