អភិបាលខេត្តកំពង់ស្ពឺផ្តាំផ្ញើកម្លាំងថ្មីឲ្យក្លាយជាទាហានមានគុណភាព!

(កំពង់ស្ពឺ)៖ ក្នុងពិធីសំណេះសំណាល និងជូនដំណើរយោធិនថ្មីរបស់កងរាជអាវុធហត្ថ ខេត្តកំពង់ស្ពឺ លោកបណ្ឌិត ជាម ចន្ទ័សោភ័ណ អភិបាលខេត្ត បានផ្ញើសារសំខាន់មួយទៅកាន់យុវជនជំនាន់ថ្មីថា ការហ្វឹកហ្វឺនមិនមែនត្រឹមជាកាតព្វកិច្ច ប៉ុន្តែជាគន្លងបង្កើតខ្លួនឲ្យក្លាយជាធនធានមានតម្លៃសម្រាប់ជាតិ។

លោកអភិបាលខេត្តបានមានប្រសាសន៍ថា «ក្មួយៗជាកម្លាំងស្នូល សម្រាប់ការពារសន្តិសុខជាតិ ដូច្នេះត្រូវខិតខំរៀនសូត្រ គោរពវិន័យ និងបំពេញភារកិច្ចឲ្យបានល្អ ដើម្បីអភិវឌ្ឍខ្លួនឲ្យក្លាយជាកងកម្លាំងមានគុណភាព»។

សារនេះមិនត្រឹមជាការលើកទឹកចិត្តទេ ប៉ុន្តែជាការរំលេចតួនាទីយុទ្ធសាស្ត្ររបស់យុវជនក្នុងការរក្សាសន្តិភាព និងការអភិវឌ្ឍប្រទេស។ លោកបណ្ឌិតអភិបាលខេត្តបានបញ្ជាក់បន្ថែមថា ប្រទេសជាតិមានស្ថិរភាព និងរីកចម្រើនបាន គឺពឹងផ្អែកលើកម្លាំងដែលមានវិន័យ និងសមត្ថភាពពិតប្រាកដ។

ក្នុងបរិយាកាសពោរពេញដោយការលើកទឹកចិត្ត និងការគាំទ្រពីគ្រួសារ ការផ្តាំផ្ញើនេះ ក្លាយជាដំបូន្មានដ៏មានតម្លៃសម្រាប់យោធិនថ្មីៗ ដែលកំពុងចាប់ផ្តើមដំណើរថ្មីក្នុងជីវិត ដំណើរដែលត្រូវការការអត់ធ្មត់ ការប្តេជ្ញា និងស្មារតីបម្រើជាតិជាអាទិភាព។

នៅក្នុងពិធីសំណេះសំណាល និងជូនដំណើរយោធិនថ្មីរបស់កងរាជអាវុធហត្ថ ខេត្តកំពង់ស្ពឺ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ ក៏បានលើកឡើងពីលក្ខខណ្ឌ័ក្នុងការជ្រើសរើសទ័ព ព្រមទាំងលើកឡើងពីសកកម្មភាពកងរាជអាវុធហត្ថខេត្តកំពង់ស្ពឺ ក្នុងតួនាទីការពារប្រជាពលរដ្ឋ ព្រមទាំងបានលើកពីគុណប្រយោជន៍ចំពោះលេខអន្តរាគមន៍ (Hotline 1292) និងបានថ្លែងអំណរអរគុណចំពោះ លោកបណ្ឌិតជាម ចន្ទ័សោភ័ណ្ឌ អភិបាលខេត្ត ដែលតែងតែជួយឧបត្ថម្ភ និងគាំទ្រ ដល់កងរាជអាវុធហត្ថខេត្តកំពង់ស្ពឺ រហូតមក។ ជាពិសេសបានផ្តាំផ្ញើរដល់យោធិននៃកងរាជអាវុធហត្ថទើបជ្រើសរើសថ្មី ដែលបានជាប់ជាស្ថាពរទាំងអស់ ត្រូវតស៊ូអត់ធ្មត់ ព្យាយាមហ្វឹកហ្វឺនរៀនសូត្រ គោរពបទបញ្ជាផ្ទៃក្នុងសាលាឲ្យបានល្អ ដើម្បីក្លាយជាកងកម្លាំងមាន គុណភាព មានសត្ថភាព សាមុីខ្លួនម្នាក់ៗត្រូវខិតខំប្រឹងប្រែងដុះខាត់សមត្ថភាព និងជំនាញឲ្យបានខ្លាំងខ្លា៕