សិល្បៈ វប្បធម៌ និងទំនៀមទម្លាប់ប្រពៃណី ជាមូលដ្ឋានសំខាន់បំផុតនៃអត្តសញ្ញាណជាតិ

(កណ្ដាល)៖ មន្ទីរវប្បធម៌ និងវិចិត្រសិល្បៈខេត្តកណ្ដាល បានរៀបចំពិធីអបអរសាទរ​ទិវាវប្បធម៌ជាតិ ៣មីនា លើកទី២៨ ឆ្នាំ២០២៦ ក្រោមប្រធានបទ «យុវជនដើម្បីវប្បធម៌ជាតិ» ដោយមានការគាំទ្រពេញទំហឹងពីរដ្ឋបាលខេត្ត នារសៀលថ្ងៃទី២៣ ខែមីនា ឆ្នាំ២០២៦ ក្រោមអធិបតីភាព លោក ប៊ុន ផេង អភិបាលរងខេត្ត តំណាងអភិបាលខេត្តកណ្ដាល រួមទាំងកងកម្លាំងទាំងបី មន្ទីរអង្គភាពជុំវិញខេត្ត លោកគ្រូ អ្នកគ្រូ និងសិស្សានុសិស្សជាច្រើនចូលរួមយ៉ាងកុះករ។

ក្នុងឱកាសនេះ លោក ប៊ុន ផេង បានលើកឡើងថា សិល្បៈ វប្បធម៌ និងទំនៀមទម្លាប់ប្រពៃណី ជាមូលដ្ឋានសំខាន់បំផុតនៃអត្តសញ្ញាណជាតិ ដែលត្រូវបានបន្តរក្សាទុកពីបុព្វបុរសមកដល់បច្ចុប្បន្ន។ ការប្រារព្ធទិវាវប្បធម៌ជាតិ មិនត្រឹមជាការរំលឹកគុណូបការៈបុរាណបុរសប៉ុណ្ណោះទេ ប៉ុន្តែជាការបំផុសស្មារតីស្រឡាញ់ និងការពារវប្បធម៌ជាតិឲ្យបន្តរឹងមាំ។

លោកបន្តថា វិស័យវប្បធម៌ និងសិល្បៈ គឺជាគោលដៅអាទិភាពមួយរបស់រាជរដ្ឋាភិបាល ដែលមិនត្រឹមការពារអត្តសញ្ញាណជាតិប៉ុណ្ណោះទេ ប៉ុន្តែថែមទាំងជំរុញកំណើនសេដ្ឋកិច្ច តាមរយៈវិស័យទេសចរណ៍ និងឧស្សាហកម្មច្នៃប្រតិដ្ឋផងដែរ។

ជាពិសេស លោកបានអំពាវនាវឲ្យយុវជនធ្វើជាកម្លាំងបន្តវេន ដោយចូលរួមថែរក្សា អភិវឌ្ឍ និងច្នៃប្រតិដ្ឋវប្បធម៌ខ្មែរ ឲ្យសមស្របនឹងសម័យកាល ខណៈបន្តរក្សាតម្លៃដើមឲ្យបានគង់វង្ស។

ពិធីនេះក៏បានបង្ហាញពីការរួមចំណែករបស់យុវជន ក្នុងការលើកកម្ពស់មោទនភាពជាតិ និងបង្កើតអនាគតវប្បធម៌ខ្មែរឲ្យកាន់តែរីកចម្រើន៕