ចាំមើលអ្នកណា ហ៊ានទន្ទ្រានយកដីរដ្ឋនៅតាកែវទៀត!

(តាកែវ)៖ នៅព្រឹកថ្ងៃចន្ទ ទី២៣ ខែមីនា ឆ្នាំ២០២៦ លោក វ៉ី សំណាង អភិបាលខេត្តតាកែវ បានដាក់ចេញវិធានការសំខាន់ ដល់អាជ្ញាធរក្រុង-ស្រុក ក្នុងការពង្រឹងការគ្រប់គ្រងដីរដ្ឋ និងបង្កការអភិវឌ្ឍហេដ្ឋារចនាសម្ព័ន្ធក្នុងក្រុងដូនកែវឱ្យមានសោភ័ណភាព។

លោកចៅហ្វាយខេត្តបានណែនាំឱ្យចៅហ្វាយក្រុង-ស្រុក ចុះបញ្ជីដីរដ្ឋសេសសល់ទាំងអស់ ដើម្បីរក្សាទុកជាសម្បត្តិសាធារណៈ និងបម្រើប្រយោជន៍ប្រជាពលរដ្ឋ។ ព្រមទាំងបញ្ជាក់ថា ត្រូវលុបបំបាត់ការទន្ទ្រានកាន់កាប់ដីដោយអនាធិបតេយ្យ និងទប់ស្កាត់ការរំលោភយកដីចំណីផ្លូវ ប្រឡាយ ព្រែក អូរ និងបឹងបួរ ដែលបង្កការជន់លិច និងប៉ះពាល់ដល់ស្រែចម្ការរបស់ប្រជាពលរដ្ឋ។

ក្រៅពីការគ្រប់គ្រងដីធ្លី ឯកឧត្តមបានណែនាំអាជ្ញាធរមូលដ្ឋាន ប្រើយន្តការក្រៅប្រព័ន្ធតុលាការដោះស្រាយទំនាស់ ដើម្បីសម្រួលជូនប្រជាពលរដ្ឋ និងរក្សាសុខដុមរមនាក្នុងសហគមន៍។

ក្នុងផ្នែកអភិវឌ្ឍទីក្រុង លោកអភិបាលខេត្តបានជំរុញមន្ទីរជំនាញ និងរដ្ឋបាលក្រុងដូនកែវ សិក្សា និងរៀបចំប្លង់កែលម្អហេដ្ឋារចនាសម្ព័ន្ធ ដើម្បីបង្កើនសម្រស់ទីក្រុង និងទាក់ទាញភ្ញៀវទេសចរជាតិ និងអន្តរជាតិ។

កិច្ចប្រជុំនេះ មានការអញ្ជើញចូលរួមពីលោកអភិបាលរង ខេត្ត កងកម្លាំងប្រដាប់អាវុធ មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ដើម្បីអនុវត្តផែនការជាសមាសធាតុ សម្រេចបានលទ្ធផលផ្កាយមួយសម្រាប់ខេត្តតាកែវទាំងមូល៕