អភិបាលខេត្តកណ្តាលជំរុញឲ្យបង្ក្រាប Scam Online ដំណាក់កាលទី២ ឱ្យម៉ឺងម៉ាត់

(កណ្តាល)៖ ក្នុងកិច្ចប្រជុំគណៈអភិបាលខេត្ត ប្រចាំអឌ្ឍមាសទី១ ខែមីនា ឆ្នាំ២០២៦ ឯកឧត្តម គួច ចំរើន អភិបាលខេត្តកណ្តាល បានកោតសរសើរកម្លាំងសមត្ថកិច្ច និងមន្ទីរពាក់ព័ន្ធ ដែលបានបង្ក្រាបបទល្មើស Scam Online ទទួលបានលទ្ធផលល្អក្នុងដំណាក់កាលទី១។

ឯកឧត្តមបានជំរុញឱ្យបន្តប្រតិបត្តិការដំណាក់កាលទី២ ឱ្យមានប្រសិទ្ធភាពខ្ពស់ ដោយមានគោលដៅលុបបំបាត់បទល្មើសនេះឱ្យអស់ ព្រមទាំងណែនាំឱ្យត្រួតពិនិត្យការភ្ជាប់អ៊ីនធឺណិតធំៗ និងតាមដានទីតាំងសង្ស័យឱ្យបានម៉ឺងម៉ាត់។

ជាមួយគ្នានេះ អាជ្ញាធរត្រូវសហការជាមួយសណ្ឋាគារ ផ្ទះសំណាក់ និងផ្ទះជួល ក្នុងការកត់ត្រាព័ត៌មានភ្ញៀវ និងរាយការណ៍ករណីសង្ស័យ ខណៈការផ្សព្វផ្សាយអំពីល្បិចបោកប្រាស់ និងជួញដូរមនុស្ស ត្រូវអនុវត្តឱ្យទូលំទូលាយ។

អភិបាលខេត្តក៏បានណែនាំឱ្យអាជ្ញាធរក្រុង-ស្រុក ចាត់វិធានការរៀបចំសណ្ដាប់ធ្នាប់សាធារណៈ ដើម្បីកាត់បន្ថយការកកស្ទះ និងលើកកម្ពស់សោភ័ណភាពក្នុងមូលដ្ឋាន៕