សំណង់ជិតរួច ប៉ុន្តែលិខិតនៅចំណាក់កាល “ពុំយល់ទាស់” ប៉ុណ្ណោះ មហាជនសួរអំពីតម្លាភាព!

(កណ្ដាល)៖ ករណីសំណង់អគារផ្ទះល្វែងមួយកន្លែង ស្ថិតនៅភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល កំពុងទទួលការចាប់អារម្មណ៍ពីមហាជន បន្ទាប់ពីមានឯកសារផ្លូវការបង្ហាញថា សំណើសុំអនុញ្ញាតសាងសង់នៅត្រឹមដំណាក់កាល “ពុំយល់ទាស់” ខណៈស្ថានភាពជាក់ស្តែង ការសាងសង់ហាក់ដូចជាកំពុងដំណើរការទៅមុខជាបន្តបន្ទាប់។

តាមមតិប្រជាពលរដ្ឋ និងអ្នកតាមដានសង្គមមួយចំនួន បានសង្កេតឃើញថា មានភាពខុសគ្នារវាងដំណើរការនីតិវិធី និងការអនុវត្តជាក់ស្តែង ដែលធ្វើឲ្យកើតមានសំណួរ និងការចង់បានព័ត៌មានបន្ថែមពីសំណាក់សាធារណៈ។

យោងតាមលិខិតរដ្ឋបាលខេត្ត បានបញ្ជាក់ថា ម្ចាស់សំណង់ត្រូវបំពេញលក្ខខណ្ឌចាំបាច់ និងទទួលបាន “លិខិតអនុញ្ញាតបើកការដ្ឋាន” ជាមុនសិន មុននឹងចាប់ផ្តើមសាងសង់។ ក្នុងករណីមិនគោរព នឹងអាចមានវិធានការតាមផ្លូវច្បាប់ តាមដែលបានកំណត់។

ទោះជាយ៉ាងណា ស្ថានភាពនៅទីតាំងសំណង់ បើតាមការសង្កេតរបស់មហាជន មិនទាន់ឃើញមានការផ្អាកការដ្ឋាន ឬវិធានការណាមួយច្បាស់លាស់នៅឡើយ។ ប្រការនេះបានបង្កឲ្យមានការរំពឹងទុកថា អាជ្ញាធរពាក់ព័ន្ធនឹងចេញមកបំភ្លឺ ដើម្បីបង្ហាញភាពច្បាស់លាស់ និងបង្កើនជំនឿទុកចិត្តរបស់សាធារណៈ។

ពាក់ព័ន្ធនឹងករណីនេះ លោក អន ស្រស់ មន្ត្រីការិយាល័យសំណង់ខេត្តកណ្ដាល បានប្រាប់អ្នកសារព័ត៌មានថា៖ «មានលិខិតអនុញ្ញាតពីសាលាខេត្តកណ្ដាលហើយ ហើយលិខិតអនុញ្ញាតបើកការដ្ឋានកំពុងចរន្តនៅបន្ទប់លោកប្រធាន»។

ជាមួយគ្នានេះ អង្គភាពព័ត៌មាន ឌឹមីរ័រ ក៏បានព្យាយាមសុំការបំភ្លឺពីលោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្ម និងសំណង់ខេត្តកណ្ដាលផងដែរ ប៉ុន្តែមិនអាចទំនាក់ទំនងបានទេ ដោយសារពេលហៅទូរស័ព្ទ ទទួលបានការឆ្លើយតបថា ទូរស័ព្ទកំពុងជាប់រវល់។

ទន្ទឹមនោះ លោក សុខ សុវណ្ណារីទ្ធិ ប្រធានការិយាល័យសំណង់ និងភូមិសាស្ត្រ ក៏បានឆ្លើយតបឱ្យអង្គភាព The Mirror News ថា៖ «មិនចាំបាច់ស៊ីជម្រៅរឿងសំណង់ទេ ខ្ញុំចេះធ្វើការហើយ»។

អ្នកតាមដានសង្គមយល់ឃើញថា ករណីនេះ គួរត្រូវបានបំភ្លឺឲ្យបានច្បាស់លាស់ ពិសេសពាក់ព័ន្ធនឹងនីតិវិធីអនុញ្ញាត និងដំណាក់កាលអនុវត្តជាក់ស្តែង ដើម្បីជៀសវាងការយល់ច្រឡំ។

ទាក់ទិនករណីសំណង់ខាងលើនេះ អង្គភាព The Mirror News ក៏ពុំអាចសុំការបំភ្លឺពីលោក ឌឹម បូរ៉ា អភីបាលរងខេត្តកណ្ដាលនិងជាអ្នកនាំពាក្យរបស់រដ្ឋបាលខេត្តបានផងដែរដោយលោកបានជម្រាបមកវិញថា លោកកំពុងជាប់ប្រជុំ។

ការអនុវត្តច្បាប់ឲ្យមានភាពច្បាស់លាស់ ស្មើភាព និងមានតម្លាភាព គឺជាកត្តាសំខាន់ក្នុងការធានាឲ្យការអភិវឌ្ឍន៍សំណង់ប្រព្រឹត្តទៅដោយមានរបៀបរៀបរយ ស្របតាមបទដ្ឋានបច្ចេកទេស និងការពារផលប្រយោជន៍សាធារណៈ។

មហាជនសង្ឃឹមថា អាជ្ញាធរនឹងពិនិត្យ និងផ្តល់ការបំភ្លឺបន្ថែម ប្រសិនបើមានចំណុចមិនច្បាស់ ឬមានការយល់ច្រឡំ ដើម្បីធានាបាននូវភាពជាក់លាក់ និងជំនឿទុកចិត្តពីសាធារណៈ។

គួរជម្រាបជូនថា លោក ឃុន កុសល និងលោកស្រី សឿង សុខលីប ត្រូវបានគេស្គាល់ថាគឺជាអ្នកដែលបានដាក់ពាក្យស្នើសុំលិខិតអនុញ្ញាតសាងសង់ អគារផ្ទះល្វែង មួយកន្លែង ស្ថិតនៅភូមិកំពង់សំណាញ់១ សង្កាត់តាខ្មៅ ក្រុងតាខ្មៅ ខេត្តកណ្ដាល៕