វាយប្លន់យកម៉ូតូពេលយប់! សមត្ថកិច្ចបង្ក្រាបបានទាន់ពេល ឃាត់ខ្លួនជនសង្ស័យ៤នាក់

(ភ្នំពេញ)៖ កម្លាំងនគរបាលជំនាញព្រហ្មទណ្ឌរាជធានីភ្នំពេញ សហការជាមួយអធិការដ្ឋាននគរបាលខណ្ឌពោធិ៍សែនជ័យ បានបើកប្រតិបត្តិការស្រាវជ្រាវយ៉ាងសកម្ម រហូតឃាត់ខ្លួនជនសង្ស័យចំនួន ៤នាក់ ពាក់ព័ន្ធករណីវាយប្លន់យកម៉ូតូពីស្ត្រីរងគ្រោះម្នាក់ នៅសង្កាត់កាកាប២។

ហេតុការណ៍នេះបានកើតឡើងនៅវេលាម៉ោង ០១:៥៧នាទីយប់ ថ្ងៃទី១៧ ខែមីនា ឆ្នាំ២០២៦ នៅចំណុចដីវាល ផ្លូវបេតុង ក្នុងភូមិត្រពាំងជ្រៃ សង្កាត់កាកាប២ ខណ្ឌពោធិ៍សែនជ័យ ដែលជនសង្ស័យបានប្រើអំពើហិង្សាវាយប្លន់យកម៉ូតូម៉ាក Honda Scoopy ស៊េរីឆ្នាំ២០២៥ មួយគ្រឿងពីជនរងគ្រោះឈ្មោះ ភិន ចាន់សេរី អាយុ ៣៤ឆ្នាំ។

បន្ទាប់ពីទទួលបានបញ្ជាដោយផ្ទាល់ពីថ្នាក់ដឹកនាំ កម្លាំងជំនាញបានចុះស្រាវជ្រាវយ៉ាងតឹងរឹង រហូតដល់វេលាម៉ោង ១៣:០៨នាទី ថ្ងៃទី២០ ខែមីនា ឆ្នាំ២០២៦ ក៏បានឃាត់ខ្លួនជនសង្ស័យទាំង ៤នាក់ នៅចំណុចបន្ទប់ជួលមួយកន្លែង ក្នុងសង្កាត់កាកាប២ ខណ្ឌពោធិ៍សែនជ័យ ព្រមទាំងដកហូតវត្ថុតាងពាក់ព័ន្ធមួយចំនួន។

ក្នុងចំណោមជនសង្ស័យ មានម្នាក់ជាអ្នកទទួលផលពីអំពើចោរកម្មផងដែរ។

បច្ចុប្បន្នសមត្ថកិច្ចកំពុងបន្តសាកសួរ និងចាត់ការតាមនីតិវិធីច្បាប់ ដើម្បីនាំខ្លួនទៅតុលាការចាត់ការបន្ត។

ប្រតិបត្តិការនេះបង្ហាញពីការប្តេជ្ញារបស់សមត្ថកិច្ច ក្នុងការការពារសុវត្ថិភាពជូនប្រជាពលរដ្ឋ និងបង្ក្រាបបទល្មើសឱ្យបានទាន់ពេលវេលា៕