មេដឹកនាំមានបេះដូងមនុស្សធម៌! សម្ដេចតេជោ ហ៊ុន សែន បន្តឈរជាមួយប្រជាពលរដ្ឋក្នុងគ្រប់ស្ថានភាព!

(ភ្នំពេញ)៖ នៅព្រឹកនេះ សម្ដេចតេជោ ហ៊ុន សែន បានឆ្លៀតពេលដ៏មានតម្លៃ ដើម្បីទៅសួរសុខទុក្ខនាយក្រិន ដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត្រ បង្ហាញពីទឹកចិត្តមេត្តាករុណា និងការយកចិត្តទុកដាក់ដ៏ជ្រាលជ្រៅចំពោះប្រជាពលរដ្ឋគ្រប់ស្រទាប់វណ្ណៈ។

ក្នុងឱកាសនោះ សម្ដេចបានមានប្រសាសន៍យ៉ាងកក់ក្តៅថា៖
“មនុស្សយើងនៅពេលជួបវិបត្តិ មិនគួរត្រូវបានទុកឲ្យឯកោឡើយ។ រដ្ឋាភិបាល និងសង្គម ត្រូវតែឈរជាមួយពួកគេ ដើម្បីឲ្យពួកគេចេញពីភាពលំបាកវិញដោយកម្លាំងចិត្ត និងសង្ឃឹមថ្មី។”

ស្ថានភាពនាយក្រិនកំពុងប្រឈមមុខ មិនត្រឹមតែជំងឺប៉ុណ្ណោះទេ ប៉ុន្តែការបាត់បង់ឪពុក និងការលាក់ព័ត៌មានមិនឲ្យដឹង គឺជាការវាយប្រហារផ្លូវចិត្តយ៉ាងធ្ងន់ធ្ងរ។ ទោះជាយ៉ាងណា ការយកចិត្តទុកដាក់ពីសម្ដេច បានក្លាយជាកម្លាំងលើកទឹកចិត្តដ៏ធំធេងសម្រាប់នាយក្រិនក្នុងការបន្តប្រយុទ្ធជាមួយវិបត្តិនេះ។

ជាមួយគ្នានេះ សម្ដេចក៏បានថ្លែងអំណរគុណ និងកោតសរសើរដល់សិល្បករ សិល្បការិនីទាំងអស់ ដែលបានចូលរួមជួយថែទាំនាយក្រិន ដោយពិសេសស្រីនិច ហៅប្រិមប្រិយ ដែលបានបោះបង់ការងារផ្ទាល់ខ្លួន មកថែទាំដោយចិត្តស្មោះត្រង់។

សម្ដេចក៏បានបន្ថែមថា៖ “សាមគ្គីភាព និងការជួយគ្នាក្នុងពេលលំបាក គឺជាគុណតម្លៃដ៏អស្ចារ្យបំផុតរបស់សង្គមយើង ដែលត្រូវរក្សា និងលើកស្ទួយឲ្យកាន់តែរឹងមាំ។”

មិនត្រឹមតែប៉ុណ្ណោះ សម្ដេចបានផ្តល់ការណែនាំឲ្យប្រិមប្រិយ (ស្រីនិច) ជួយរៀបចំការសិក្សារបស់កូននាយក្រិនទាំង៣នាក់នៅខេត្តបាត់ដំបង ឲ្យបានត្រឡប់ចូលរៀនវិញ បន្ទាប់ពីនាយក្រិនចេញពីមន្ទីរពេទ្យ ដែលជាការបង្ហាញពីទស្សនវិស័យវែងឆ្ងាយ និងការយកចិត្តទុកដាក់លើអនាគតកូនៗផងដែរ។

ជាការអន្តរាគមន៍ដ៏មានន័យនេះ ក៏មិនអាចខ្វះបាននូវការខិតខំប្រឹងប្រែងរបស់ក្រុមគ្រូពេទ្យ ដែលបានព្យាបាលនាយក្រិនដោយស្មារតីវិជ្ជាជីវៈ និងមនុស្សធម៌ខ្ពស់។

សកម្មភាពរបស់សម្ដេចតេជោ ហ៊ុន សែន ក៏បានបញ្ជាក់យ៉ាងច្បាស់ថា មេដឹកនាំមិនត្រឹមតែដឹកនាំដោយគោលនយោបាយប៉ុណ្ណោះទេ ប៉ុន្តែដឹកនាំដោយបេះដូង និងការយកចិត្តទុកដាក់ពិតប្រាកដចំពោះជីវិតប្រជាពលរដ្ឋ៕ ដោយ៖ ហ៊ាង ប៊ុនថា