ល្បែងអ៊ីនធឺណិតដំណើរការដល់យប់ជ្រៅ! ហេតុអ្វីអាជ្ញាធរខណ្ឌដូនពេញស្ងៀមស្ងាត់?

(ភ្នំពេញ)៖ នៅតាមបណ្ដោយផ្លូវលេខ៥១ ក្នុងសង្កាត់ផ្សារថ្មីទី៣ ខណ្ឌដូនពេញ មានទីតាំងល្បែងស៊ីសងតាមអ៊ីនធឺណិតមួយកន្លែង កំពុងដំណើរការយ៉ាងបើកចំហរហូរហែដល់យប់ជ្រៅ ទាក់ទាញយុវជនយុវនារីចូលលេងយ៉ាងគគ្រឹកគគ្រេង។ ទិដ្ឋភាពចេញ-ចូលមិនដាច់បន្ទាត់នេះ បានធ្វើឲ្យប្រជាពលរដ្ឋនៅជុំវិញតំបន់សួរជាសំណួរដែលមិនអាចមើលរំលងបានថា តើអាជ្ញាធរមានសមត្ថកិច្ចបានដឹងអំពីសកម្មភាពនេះដែរឬទេ?

ការសង្កេតឃើញជាក់ស្តែងបង្ហាញថា ទីតាំងនេះមានកុំព្យូទ័រច្រើនគ្រឿងតម្រៀបជាជួរ សម្រាប់បម្រើអ្នកលេងគ្រប់វ័យ ដោយមិនមានការខ្វល់ខ្វាយចំពោះច្បាប់ និងបទបញ្ជារដ្ឋឡើយ។ ខណៈដែលអាជ្ញាធរខណ្ឌដូនពេញហាក់បីដូចជាមើលមិនឃើញ ឬមិនទាន់មានវិធានការបង្ក្រាបច្បាស់លាស់ នេះបានបង្កឲ្យមានការរិះគន់ពីសាធារណជនថា មានភាពព្រងើយកន្តើយ ឬអនុវត្តច្បាប់មិនទាន់ដល់កម្រិតគោលដៅ។

ប្រជាពលរដ្ឋនៅជិតទីតាំងនោះបានលើកឡើងថា ទោះបីមានការប្រកាសរឹតបន្តឹងលើល្បែងស៊ីសងក៏ដោយ ប៉ុន្តែទីតាំងនេះនៅតែបន្តដំណើរការជាធម្មតា ហើយអ្នកចូលលេងក៏មានទំនុកចិត្តខ្ពស់ ដោយមិនភ័យខ្លាចការចុះបង្ក្រាបឡើយ។ ភាព “មិនខ្លាចច្បាប់” បែបនេះ កំពុងបង្កការព្រួយបារម្ភថា អាចជាមូលហេតុនាំឲ្យបញ្ហាសង្គមផ្សេងៗកើតឡើង ដូចជា អសន្តិសុខ ការខាតបង់សេដ្ឋកិច្ចគ្រួសារ និងអនាគតយុវជន។

ស្ថានភាពនេះក៏បង្ហាញពីចន្លោះខ្វះខាតក្នុងការអនុវត្តច្បាប់ និងការត្រួតពិនិត្យរបស់អាជ្ញាធរមូលដ្ឋាន។ ព្រោះប្រសិនបើគ្មានការចុះពិនិត្យជាបន្តបន្ទាប់ និងវិធានការតឹងរ៉ឹងទេ ទីតាំងល្បែងបែបនេះអាចនឹងកាន់តែរីករាលដាល និងក្លាយជាបញ្ហាសង្គមធ្ងន់ធ្ងរជាងមុន។

ក្នុងបរិបទនេះ ប្រជាពលរដ្ឋបានអំពាវនាវឲ្យអាជ្ញាធរថ្នាក់លើ និងស្ថាប័នពាក់ព័ន្ធ ចុះស្រាវជ្រាវ និងអនុវត្តច្បាប់ឲ្យបានតឹងរ៉ឹងលើទីតាំងល្បែងស៊ីសងអ៊ីនធឺណិតខាងលើ ដើម្បីរក្សាសន្តិសុខសង្គម និងស្តារឡើងវិញនូវទំនុកចិត្តរបស់ប្រជាពលរដ្ឋចំពោះការអនុវត្តច្បាប់។

ចុងក្រោយនេះ សំណួរដែលនៅតែបន្តលើកឡើងគឺ៖ តើអាជ្ញាធរខណ្ឌដូនពេញ នឹងចូលរួមដោះស្រាយបញ្ហានេះយ៉ាងដូចម្តេច ឬទុកឲ្យវាបន្តដំណើរការដូចសព្វថ្ងៃ?