ធនាគារជាតិនៃកម្ពុជាដាក់ចេញប្រកាសថ្មី ពង្រឹងសន្ទនីយភាព និងស្ថិរភាពហិរញ្ញវត្

(ភ្នំពេញ)៖ លោកជំទាវ ជា សិរី ទេសាភិបាលធនាគារជាតិនៃកម្ពុជាបានបន្តពង្រឹងគោលនយោបាយថែរក្សាស្ថិរភាពហិរញ្ញវត្ថុ ដោយដាក់ចេញប្រកាសថ្មីមួយស្តីពីការផ្តល់សន្ទនីយភាពចាំបាច់សម្រាប់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ។

យោងតាមប្រកាសលេខ ធ៣៧.០២៦.២០៤ ប្រ.ក ចុះថ្ងៃទី២០ ខែមីនា ឆ្នាំ២០២៦ របស់ ធនាគារជាតិនៃកម្ពុជា បានកំណត់ឲ្យប្រើប្រាស់ជំនួសប្រកាសលេខ ធ៧-០១៥-១៥៣ ប្រ.ក ចុះថ្ងៃទី១៧ ខែមីនា ឆ្នាំ២០១៥ ស្តីពីការផ្តល់សន្ទនីយភាពចំពោះគ្រឹះស្ថានធនាគារ និងហិរញ្ញវត្ថុ។

ប្រកាសថ្មីនេះ មានគោលបំណងសំខាន់ក្នុងការបង្កើតក្របខ័ណ្ឌច្បាស់លាស់ និងរឹងមាំសម្រាប់ការផ្តល់សន្ទនីយភាពចាំបាច់ ដែលអាចប្រើប្រាស់ជាជម្រើសសំខាន់សម្រាប់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ ក្នុងការទប់ស្កាត់ហានិភ័យនានា និងរក្សាស្ថិរភាពនៃប្រព័ន្ធហិរញ្ញវត្ថុជាតិ។

ជាពិសេស ប្រកាសនេះអនុញ្ញាតឲ្យគ្រឹះស្ថានដែលកំពុងជួបបញ្ហាសន្ទនីយភាពបណ្ដោះអាសន្ន អាចស្នើសុំទទួលបានសន្ទនីយភាពចាំបាច់ជាជម្រើសចុងក្រោយ ដើម្បីបញ្ឈប់ការរីករាលដាលនៃហានិភ័យទៅកាន់ប្រព័ន្ធទាំងមូល និងធានាបាននូវស្ថិរភាពហិរញ្ញវត្ថុ។

ក្រោមក្របខ័ណ្ឌថ្មីនេះ ធនាគារជាតិនៃកម្ពុជា នឹងបន្តអនុវត្តតួនាទីជាអាជ្ញាធរអាណាព្យាបាលយ៉ាងតឹងរ៉ឹង ដោយធានាថា ការផ្តល់សន្ទនីយភាពចាំបាច់ត្រូវអនុវត្តដោយប្រុងប្រយ័ត្ន មានលក្ខខណ្ឌច្បាស់លាស់ និងផ្អែកលើគោលការណ៍គ្រប់គ្រងហានិភ័យ ដើម្បីការពារប្រព័ន្ធធនាគារទាំងមូលឲ្យមានសុវត្ថិភាព និងចីរភាពក្នុងរយៈពេលវែង។

វិធានការថ្មីនេះ ត្រូវបានមើលឃើញថា ជាជំហានសំខាន់មួយក្នុងការកែលម្អប្រព័ន្ធហិរញ្ញវត្ថុកម្ពុជា ឲ្យកាន់តែមានភាពរឹងមាំ និងអាចប្រឈមមុខនឹងហានិភ័យសេដ្ឋកិច្ចនានាបានយ៉ាងមានប្រសិទ្ធភាព៕