ទិសដៅថ្មី ៥ចំណុច! កសិកម្មកម្ពុជា បន្តឡើងកម្រិត ទំនើប សម្បូរបែប និងមានភាពធន់

(ភ្នំពេញ)៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី១៩ មីនា ឆ្នាំ២០២៦ បានដាក់ចេញទិសដៅអាទិភាព ៥ចំណុច ដើម្បីជំរុញវិស័យកសិកម្មកម្ពុជា ឲ្យកាន់តែរឹងមាំ និងទាន់សម័យ។

លោកបានបញ្ជាក់ថា ឆ្នាំ២០២៥ វិស័យកសិកម្មបន្តបង្ហាញភាពធន់ខ្ពស់ ជាឆ្អឹងខ្នងសេដ្ឋកិច្ចជាតិ ដោយរួមចំណែកប្រមាណ ១៦.១% ក្នុង GDP និងនាំចេញជិត ៦.៥ពាន់លានដុល្លារ ខណៈផលិតកម្មស្រូវលើសតម្រូវការ និងអង្ករកម្ពុជាបន្តឈ្នះពាន “អង្ករល្អជាងគេលើពិភពលោក”។

ជាមួយនឹងសមិទ្ធផលលេចធ្លោទាំងនេះ ក្រសួងក៏បានពង្រីកទីផ្សារ អភិវឌ្ឍសហគមន៍កសិកម្មទំនើប និងគាំទ្រកសិករយ៉ាងសកម្ម។

សម្រាប់ឆ្នាំ២០២៦ ទិសដៅអាទិភាព ៥រួមមាន៖ *១.រក្សាស្ថិរភាពថ្លៃកសិផល*២.ពង្រីកសហគមន៍កសិកម្មទំនើប និងពង្រឹងមន្ត្រីឃុំ*៣.បង្ក្រាបបទល្មើសព្រៃឈើ ជលផល និងសត្វព្រៃ*៤.គ្រប់គ្រងដីរដ្ឋប្រកបដោយចីរភាព*៥.ជំរុញការនាំចេញឆ្លងកាត់ឡាវ ទៅទីផ្សារចិន។

លោក ឌិត ទីណា បានបង្ហាញជំនឿថា តាមរយៈកិច្ចសហការរួមគ្នា វិស័យកសិកម្មកម្ពុជា នឹងបន្តបង្កើតសមិទ្ធផលថ្មីៗ បង្កើនចំណូលកសិករ និងជំរុញសេដ្ឋកិច្ចជាតិឲ្យរីកចម្រើនប្រកបដោយចីរភាព៕