អភិបាលខេត្តរតនគិរីប្រកាសមិនអនុញ្ញាតឲ្យមាន Online Scam ប៉ុន្តែល្បែងស៊ីសងនៅតែរីករាលដាល! តើការបង្ក្រាបនៅឯណា?

(រតនគិរី)៖ ប្រជាពលរដ្ឋនៅក្នុងមូលដ្ឋានក្រុងបានលុងកំពុងសម្តែងការព្រួយបារម្ភយ៉ាងខ្លាំង ចំពោះសកម្មភាពល្បែងស៊ីសងខុសច្បាប់ដែលបន្តដំណើរការយ៉ាងរលូនអស់រយៈពេលជាច្រើនខែឆ្នាំមកហើយ ខណៈដែលវិធានការបង្ក្រាបនៅតែមិនទាន់ឃើញមានប្រសិទ្ធភាពជាក់ស្តែង។ ស្ថានភាពនេះ បង្កឱ្យមានការខាតបង់ទាំងផ្នែកសេដ្ឋកិច្ច សន្តិសុខ និងសណ្ដាប់ធ្នាប់សង្គមយ៉ាងគួរឱ្យព្រួយបារម្ភ។

ប្រភពបានឲ្យដឹងថា កាលពីថ្ងៃទី១៨ ខែមីនា ឆ្នាំ២០២៦ មានទីតាំងល្បែងស៊ីសងមួយកន្លែងស្ថិតនៅភូមិទេសអន្លង់ សង្កាត់បឹងកន្សែង ក្រុងបានលុង ខេត្តរតនគិរី ដែលត្រូវបានគេស្គាល់ថាមានម្ចាស់ឈ្មោះ ងួន សុណ្ណា ហៅអូនធំ បានបើកល្បែងជាច្រើនប្រភេទ រួមមាន បៀរ អាប៉ោង និងភ្នាល់ជល់មាន់តាមអនឡាញ ដំណើរការជារៀងរាល់ថ្ងៃចាប់ពីម៉ោង ៩:០០ ព្រឹក ដល់ម៉ោង ៦:០០ ល្ងាច ដោយមិនឃើញមានការចូលរួមបង្ក្រាបយ៉ាងតឹងរឹងឡើយ។

អ្វីដែលគួរឱ្យកត់សម្គាល់នោះ គឺស្ថានភាពជាក់ស្តែងនេះ ហាក់ដូចជាមិនសមស្របនឹងគោលការណ៍ដឹកនាំរបស់លោកអភិបាលខេត្តរតនគិរីឡើយ។ ព្រោះជាក់ស្តែង លោកអភិបាលខេត្តតែងតែបង្ហាញជំហរយ៉ាងច្បាស់ថា “ស្អប់ល្បែងស៊ីសងខុសច្បាប់យ៉ាងខ្លាំង” ហើយក៏បានណែនាំជាបន្តបន្ទាប់ឲ្យកម្លាំងសមត្ថកិច្ចពាក់ព័ន្ធ ត្រូវចាត់វិធានការបង្ក្រាបភ្លាមៗ ក្រោយពេលទទួលបានព័ត៌មាន មិនឲ្យមានការយឺតយ៉ាវ ឬការលើកលែងណាមួយឡើយ។

លើសពីនេះទៀត លោកអភិបាលខេត្តក៏ធ្លាប់អះអាងយ៉ាងម៉ឺងម៉ាត់ថា ខេត្តរតនគិរី មិនអនុញ្ញាតឲ្យមានសកម្មភាព Online Scam ឬបទល្មើសបច្ចេកវិទ្យាផ្សេងៗកើតមានឡើយ ដើម្បីរក្សាបរិយាកាសសន្តិសុខ និងទំនុកចិត្តសម្រាប់ប្រជាពលរដ្ឋ និងវិនិយោគិន។ ប៉ុន្តែការបន្តមានល្បែងស៊ីសងតាមអនឡាញ និងសកម្មភាពខុសច្បាប់នៅមូលដ្ឋានវិញ កំពុងបង្កជាសំណួរថា តើការអនុវត្តនៅថ្នាក់ក្រោម បានអនុវត្តតាមការណែនាំនេះយ៉ាងពេញលេញហើយឬនៅ?

សកម្មភាពល្បែងស៊ីសង មិនត្រឹមតែជាការល្មើសច្បាប់ប៉ុណ្ណោះទេ ប៉ុន្តែវាជាមូលហេតុនាំឲ្យកើតមានអំពើចោរកម្ម អំពើហិង្សាក្នុងគ្រួសារ បំណុល និងបញ្ហាសង្គមផ្សេងៗ ដែលប៉ះពាល់ដល់គោលនយោបាយ “ភូមិ-ឃុំមានសុវត្ថិភាព” និងធ្វើឱ្យប្រជាពលរដ្ឋបាត់បង់ទំនុកចិត្តលើការគ្រប់គ្រងរបស់អាជ្ញាធរ។

តើគួរធ្វើដូចម្ដេវដើម្បីជំរុញឱ្យមានការអនុវត្តវិធានការឱ្យសមស្របនឹងគោលការណ៍ដឹកនាំខាងលើ? តើអាជ្ញាធរពាក់ព័ន្ធគួរត្រូវពង្រឹងការត្រួតពិនិត្យ ចាត់វិធានការបង្ក្រាបឲ្យបានទាន់ពេលវេលា និងមានប្រសិទ្ធភាព ពិសេសត្រូវបង្ហាញលទ្ធផលជាក់ស្តែង ដើម្បីឲ្យសមនឹងការណែនាំ និងការប្តេជ្ញារបស់ថ្នាក់ដឹកនាំខេត្តដោយរបៀបណា?

ទាក់ទងចម្ងល់ខាងលើ ប្រជាពលរដ្ឋក្នុងមូលដ្ឋាន សូមអំពាវនាវដល់អាជ្ញាធរខេត្ត និងមន្ត្រីជំនាញពាក់ព័ន្ធ មេត្តាចាត់វិធានការបង្ក្រាបទីតាំងល្បែងស៊ីសងខាងលើឱ្យបានឆាប់រហ័ស និងតឹងរឹង ដើម្បីស្តារឡើងវិញនូវសន្តិសុខ សណ្តាប់ធ្នាប់សង្គម និងទំនុកចិត្តរបស់ប្រជាពលរដ្ឋ ស្របតាមគោលការណ៍ដឹកនាំដែលបានដាក់ចេញ៕