អបអរសាទរប្រជាពលរដ្ឋក្រុងតាខ្មៅ!  កម្ពុជា-ជប៉ុន ចុះហត្ថលេខាលើលិខិតប្ដូរសារ ស្ដីពីការកែសម្រួលហិរញ្ញប្បទានឥតសំណងសម្រាប់គម្រោងពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ

(កណ្ដាល)៖ នៅព្រឹកថ្ងៃទី១៩ ខែមីនា ឆ្នាំ២០២៦ នៅទីស្តីការក្រសួង ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម UENO Atsushi ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាលើលិខិតប្ដូរសារ ស្ដីពីការកែសម្រួលហិរញ្ញប្បទានឥតសំណងរបស់ប្រទេសជប៉ុន សម្រាប់គម្រោងពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ។

គម្រោងនេះត្រូវបានបន្ថែមថវិកាពី ៣.៤២១ លានយ៉េន (ប្រមាណ ២២លានដុល្លារអាម៉េរិក) ទៅ ៣.៥៦៨ លានយ៉េន (ប្រមាណ ២៣លានដុល្លារអាម៉េរិក) ដែលជាការបង្ហាញពីការយកចិត្តទុកដាក់ និងការគាំទ្រយ៉ាងខ្លាំងពីរដ្ឋាភិបាលជប៉ុន ចំពោះការអភិវឌ្ឍន៍វិស័យទឹកស្អាតនៅកម្ពុជា។

ការពង្រីកប្រព័ន្ធផ្គត់ផ្គង់ទឹកស្អាតនេះ នឹងជួយធានាឲ្យប្រជាពលរដ្ឋក្នុងក្រុងតាខ្មៅ ទទួលបានទឹកស្អាតប្រើប្រាស់គ្រប់គ្រាន់ មានសុវត្ថិភាព និងល្អសម្រាប់សុខភាព ជាពិសេសគាំទ្រដល់ការរីកចម្រើននៃទីក្រុង និងជីវភាពរស់នៅប្រជាជនឲ្យកាន់តែប្រសើរឡើង។

នេះជាជំហានសំខាន់មួយទៀតក្នុងការពង្រឹងមិត្តភាព និងកិច្ចសហប្រតិបត្តិការរវាងកម្ពុជា–ជប៉ុន ដែលតែងតែឈរជាមួយគ្នាក្នុងការអភិវឌ្ឍន៍ប្រកបដោយចីរភាព។

អបអរសាទរ ក្រុងតាខ្មៅ កាន់តែរីកចម្រើន!