ACU មិនលើកលែង សូម្បីមន្ត្រីខ្លួនឯង! ឃាត់មន្ត្រី៣នាក់ ពាក់ព័ន្ធរំលោភអំណាច បញ្ជូនទៅតុលាការ

(ភ្នំពេញ)៖ លោក ឱម យ៉ិនទៀង ទេសរដ្ឋមន្ត្រី និងប្រធានអង្គភាពប្រឆាំងអំពើពុករលួយ (ACU) បានបញ្ជាក់ នៅព្រឹកថ្ងៃទី១៩ ខែមីនា ឆ្នាំ២០២៦នេះថា អង្គភាពបានឃាត់ខ្លួនមន្ត្រីខ្លួនឯងចំនួន៣នាក់ ពាក់ព័ន្ធករណីរំលោភអំណាច និងបានបញ្ជូនសំណុំរឿងទៅតុលាការរួចហើយ។

លោកបានបញ្ជាក់យ៉ាងច្បាស់ថា ទោះជាមន្ត្រីនៅក្នុងអង្គភាពក៏ដោយ ប្រសិនបើប្រព្រឹត្តអំពើពុករលួយ នឹងត្រូវទទួលខុសត្រូវតាមច្បាប់ដូចគ្នា ដោយអង្គភាពមានយន្តការស៊ើបអង្កេតផ្ទៃក្នុងយ៉ាងតឹងរឹង។ លោកបានបន្ថែមថា ក្នុងរយៈពេលចុងក្រោយនេះ មានមន្ត្រីពាក់ព័ន្ធជិត១០នាក់ហើយ ត្រូវបានកសាងសំណុំរឿងបញ្ជូនទៅតុលាការ។

ជនសង្ស័យទាំង៣នាក់ រួមមាន៖ *១. លោក ជឹម អូន អាយុ៣៨ឆ្នាំ មន្ត្រីនាយកដ្ឋានស៊ើបអង្កេត និងចារកម្ម នៃ ACU ជាប់សង្ស័យបទរំលោភអំណាច មានទ្រព្យសម្បត្តិដោយខុសច្បាប់ និងមិនប្រកាសទ្រព្យសម្បត្តិ និងបំណុល។ *២. លោក ជឹម សុខជឿន អាយុ៣២ឆ្នាំ ជាជំនួយការ ជាប់សង្ស័យបទសមគំនិតក្នុងអំពើរំលោភអំណាច។ *៣. អ្នកនាង ភេន រចនា អាយុ៣៦ឆ្នាំ អតីតមន្ត្រីកិច្ចសន្យា នៃនាយកដ្ឋានរដ្ឋបាល និងហិរញ្ញវត្ថុ ជាប់សង្ស័យបទសមគំនិតក្នុងអំពើរំលោភអំណាច

ការបញ្ជាក់នេះ ត្រូវបានធ្វើឡើងក្នុងឱកាសលោកអញ្ជើញបើកសិក្ខាសាលាថ្នាក់ជាតិ ស្តីពី «គណនេយ្យភាព និងតម្លាភាព នៃប្រព័ន្ធគាំពារសង្គមកម្ពុជា» ដែលមានមន្ត្រីថ្នាក់ក្រោមជាតិប្រមាណ១,៩០០នាក់ចូលរួម ដើម្បីពង្រឹងការយល់ដឹងអំពីច្បាប់ប្រឆាំងអំពើពុករលួយ និងលើកកម្ពស់ភាពតម្លាភាពក្នុងការអនុវត្តកម្មវិធីសង្គម។

លោក ឱម យ៉ិនទៀង បានបញ្ជាក់ថា ការបង្ក្រាបអំពើពុករលួយនេះ គឺអនុវត្តស្របតាមអនុសាសន៍របស់ ហ៊ុន សែន ដែលបានលើកឡើងថា ការប្រយុទ្ធប្រឆាំងអំពើពុករលួយ ត្រូវធ្វើឲ្យមនុស្ស «មិនចង់ មិនអាច និងមិនហ៊ាន» ប្រព្រឹត្តអំពើពុករលួយ។

វិធានការខាងលើ បង្ហាញពីការតាំងចិត្តរឹងមាំរបស់អង្គភាព ក្នុងការអនុវត្តច្បាប់ដោយគ្មានការលើកលែង ទោះបីជាមន្ត្រីក្នុងអង្គភាពខ្លួនឯងក៏ដោយ ដើម្បីធានាតម្លាភាព និងភាពជឿជាក់របស់សាធារណជន៕