ឯកឧត្ដម ខុន សេរីរដ្ឋា៖ ការមានបណ្ណកម្មសិទ្ធិដីធ្លីស្របច្បាប់ គឺជាគន្លឹះសំខាន់ក្នុងការធានាសុវត្ថិភាពផ្នែកច្បាប់ ជួយកាត់បន្ថយ និងបញ្ចប់វិវាទដីធ្លី

(កណ្ដាល)៖ នៅព្រឹកថ្ងៃទី១៩ ខែមីនា ឆ្នាំ២០២៦ ប្រជាពលរដ្ឋនៅឃុំព្រែកដាច់ ស្រុកលើកដែក ខេត្តកណ្ដាល បានទទួលដំណឹងរីករាយ ខណៈអាជ្ញាធរខេត្តបានរៀបចំពិធីប្រគល់វិញ្ញាបនបត្រសម្គាល់ម្ចាស់អចលនវត្ថុសរុបចំនួន ៣,៩៥៥បណ្ណ ជូនដល់អ្នកកាន់កាប់ដីក្នុងតំបន់វិនិច្ឆ័យ៤ភូមិ រួមមាន ភូមិកោះកន្ធាយ ភូមិព្រែកដាច់ ភូមិព្រែកតូច និងភូមិតាហ៊ីង។

ពិធីដ៏មានអត្ថន័យនេះ ប្រព្រឹត្តទៅក្រោមអធិបតីភាពឯកឧត្ដម ខុន សេរីរដ្ឋា អភិបាលរងខេត្តកណ្ដាល តំណាងដ៏ខ្ពង់ខ្ពស់ឯកឧត្ដម គួច ចំរើន អភិបាលនៃគណៈអភិបាលខេត្ត។

ក្នុងឱកាសនោះ ឯកឧត្ដម ខុន សេរីរដ្ឋា បានថ្លែងអំណរគុណដល់មន្ត្រីរាជការគ្រប់ជាន់ថ្នាក់ ពិសេសមន្ទីរដែនដី នគរូបនីយកម្ម និងសំណង់ ព្រមទាំងមន្ត្រីចុះបញ្ជី ដែលបានខិតខំប្រឹងប្រែងអនុវត្តការងារយ៉ាងម៉ត់ចត់ និងមានទំនួលខុសត្រូវខ្ពស់ ដើម្បីសម្រេចលទ្ធផលដ៏មានតម្លៃនេះ ស្របតាមគោលនយោបាយយុទ្ធសាស្ត្ររបស់រាជរដ្ឋាភិបាល។

ឯកឧត្តមបានបញ្ជាក់ថា ការមានបណ្ណកម្មសិទ្ធិដីធ្លីស្របច្បាប់ គឺជាគន្លឹះសំខាន់ក្នុងការធានាសុវត្ថិភាពផ្នែកច្បាប់ ជួយកាត់បន្ថយ និងបញ្ចប់វិវាទដីធ្លី ព្រមទាំងផ្តល់អត្ថប្រយោជន៍ជាច្រើនដល់ម្ចាស់ដី ដូចជា អាចយកទៅធ្វើអំណោយ បញ្ចាំ ឬប្រើប្រាស់ក្នុងសកម្មភាពសេដ្ឋកិច្ចផ្សេងៗបានដោយមានទំនុកចិត្ត។

ឯកឧត្ដមអភិបាលរងខេត្តបានបញ្ជាក់ទៀតថា ការផ្តល់បណ្ណកម្មសិទ្ធិនេះ មិនត្រឹមតែធានាសិទ្ធិកម្មសិទ្ធដីធ្លីជូនប្រជាពលរដ្ឋប៉ុណ្ណោះទេ ប៉ុន្តែថែមទាំងរួមចំណែកលើកកម្ពស់ជីវភាព សុខុមាលភាព កាត់បន្ថយភាពក្រីក្រ និងពង្រឹងស្ថេរភាពសង្គមឲ្យកាន់តែរឹងមាំផងដែរ៕