បង្ក្រាប Online Scam នៅកំពង់ស្ពឺ! ឃាត់ខ្លួនជនសង្ស័យ៧នាក់ រកឃើញសម្ភារៈជាច្រើន និងគ្រឿងញៀន

(កំពង់ស្ពឺ)៖ កម្លាំងចម្រុះនៃគណៈបញ្ជាការឯកភាពរដ្ឋបាលខេត្តកំពង់ស្ពឺ កាលពីថ្ងៃទី១៨ ខែមីនា ឆ្នាំ២០២៦ បានបើកប្រតិបត្តិការចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (Online Scam) មួយកន្លែង ស្ថិតនៅភូមិតាំងក្រសាំង ឃុំព្នាយ ស្រុកសំរោងទង ខេត្តកំពង់ស្ពឺ។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យសរុបចំនួន៧នាក់ ក្នុងនោះមានជនជាតិឥណ្ឌូណេស៊ី ៦នាក់ (ស្រី៤នាក់) និងជនជាតិខ្មែរ ១នាក់ ដែលមានតួនាទីជាអ្នកបើកបរ និងយាមទីតាំង។ ជាមួយគ្នានេះ សមត្ថកិច្ចក៏បានដកហូតវត្ថុតាងជាច្រើន រួមមាន ទូរសព្ទដៃ៥៩គ្រឿង កុំព្យូទ័រឡេបថប៧គ្រឿង ឧបករណ៍ថតសំឡេង៨គ្រឿង ឯកសណ្ឋាននគរបាលឥណ្ឌូណេស៊ី៤អាវ ព្រមទាំងស័ក្តិ និងលោហ្គោមួយចំនួន។ លើសពីនេះ ក៏បានរកឃើញម្សៅក្រាមសថ្លាសង្ស័យជាគ្រឿងញៀនចំនួន៥៩កញ្ចប់តូច និង១កញ្ចប់ធំផងដែរ។

តាមចម្លើយសារភាព ក្រុមជនសង្ស័យបានទទួលស្គាល់ថា ពួកគេពិតជាបានដំណើរការទីតាំងឆបោកអនឡាញនេះមែន ដោយមានឈ្មោះ សុខ នី ជនជាតិខ្មែរ ជាអ្នកបើកទីតាំង ខណៈឈ្មោះ ហៃ ជនជាតិចិន ត្រូវបានសង្ស័យជាមេខ្លោង និងកំពុងរត់គេចខ្លួន។

បច្ចុប្បន្ន អាជ្ញាធរបានបិទសៀលទីតាំងខាងលើ ផ្ដាច់ចរន្តអគ្គិសនី និងប្រព័ន្ធអ៊ីនធឺណិតទាំងស្រុង ខណៈជនសង្ស័យ និងវត្ថុតាង ត្រូវបានប្រគល់ជូនសមត្ថកិច្ចជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីអនុវត្តតាមនីតិវិធីច្បាប់ និងបន្តស្រាវជ្រាវរកមុខសញ្ញាមេខ្លោងពាក់ព័ន្ធ។

ជាមួយគ្នានេះ ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់យ៉ាងច្បាស់ពីការប្ដេជ្ញាចិត្តក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា ឱ្យអស់ពីកម្ពុជា ត្រឹមខែមេសា ឆ្នាំ២០២៦។ សម្ដេចបានអះអាងថា កម្ពុជា មិនមែនជាទីជម្រកសម្រាប់ឧក្រិដ្ឋជនបច្ចេកវិទ្យា ឬសកម្មភាពឆបោកឆ្លងដែនឡើយ ហើយរាល់អ្នកពាក់ព័ន្ធនឹងត្រូវប្រឈមមុខនឹងទោសទណ្ឌខ្ពស់បំផុត ដោយគ្មានការយោគយល់ឡើយ៕