កូនអភិបាលស្រុកកងមាសស្រវឹងបើកឡានបុកក្មេងរងរបួសធ្ងន់! បោះសម្ដី «បើងាប់សង២ម៉ឺនដុល្លារ» បង្កឲ្យពលរដ្ឋខឹងសម្បា

(ភ្នំពេញ)៖ ហេតុការណ៍គ្រោះថ្នាក់ចរាចរណ៍ដ៏ភ្ញាក់ផ្អើលមួយ បានកើតឡើងនៅយប់ថ្ងៃទី១៨ ខែមីនា ឆ្នាំ២០២៦ តាមបណ្ដោយផ្លូវលេខ១៧១១ ស្ថិតក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ បង្កឡើងដោយបុរសម្នាក់ដែលត្រូវបានគេស្គាល់ថា ជាកូនអភិបាលស្រុកនៅខេត្តកំពង់ចាម និងជាមន្ត្រីរាជការ បើករថយន្តក្នុងស្ថានភាពស្រវឹងជោគជាំ។

តាមប្រភពពីកន្លែងកើតហេតុបានឲ្យដឹងថា ជនបង្កបានបើករថយន្តម៉ាក FORTHING ពាក់ផ្លាកលេខ កម្ពុជា P.YEAN.7 ក្នុងល្បឿនលឿន មុននឹងជ្រុលទៅបុកម៉ូតូមួយគ្រឿងម៉ាក HONDA TODAY ពាក់ផ្លាកលេខ ភ្នំពេញ 1J-4604 បណ្ដាលឲ្យក្មេងប្រុសវ័យជំទង់ម្នាក់រងរបួសធ្ងន់ និងត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

អ្វីដែលធ្វើឲ្យប្រជាពលរដ្ឋនៅក្បែរទីតាំងកាន់តែខឹងសម្បា គឺក្រោយបង្កហេតុ ជនបង្កបានបោះសម្ដីយ៉ាងមិនសមរម្យថា «បើងាប់សង២ម៉ឺនដុល្លារ» ដែលបង្កឲ្យមានប្រតិកម្មភ្លាមៗ ដោយពលរដ្ឋមួយចំនួនមិនអាចទ្រាំបាន នាំគ្នាដាក់ម្នាក់មួយដៃ បណ្ដាលឲ្យជនបង្ករងរបួសបែកក្បាល។

ក្នុងហេតុការណ៍នោះផងដែរ ប្រជាពលរដ្ឋបានរារាំងមិនឲ្យសមត្ថកិច្ចនាំខ្លួនជនបង្កទៅប៉ុស្តិ៍ភ្លាមៗនោះទេ ដោយទាមទារឲ្យរង់ចាំខាងក្រុមគ្រួសារមកដល់សិន ទើបអនុញ្ញាតឲ្យដោះស្រាយបន្ត។

បន្ទាប់ពីទទួលព័ត៌មាន កម្លាំងសមត្ថកិច្ចមូលដ្ឋានខណ្ឌឫស្សីកែវ បានចុះដល់ទីតាំង និងសហការជាមួយជំនាញនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការវាស់វែង និងយករថយន្ត និងម៉ូតូទៅរក្សាទុក រង់ចាំដោះស្រាយតាមនីតិវិធីច្បាប់នៅពេលក្រោយ៕