“ព្រះសិវៈរាំ” រស់ឡើងវិញ! រដ្ឋមន្ត្រី ភឿង សកុណា៖ ការស្តារបដិមាព្រះសិវៈរាំឱ្យរស់ឡើងវិញ គឺជាការស្តារឡើងវិញនូវព្រលឹងវប្បធម៌ និងជំនឿរបស់ជាតិខ្មែរ ដែលមានអាយុកាលជាងមួយពាន់ឆ្នាំ

(សៀមរាប)៖ បដិមា “ព្រះសិវៈរាំ” ដ៏អស្ចារ្យ ដែលមានប្រភពពីតំបន់ប្រាសាទក្រហម នៃតំបន់កោះកេរ្តិ៍ ត្រូវបានស្តារនិងផ្គុំរូបរាងឡើងវិញបានសម្រេចជាស្ថាពរ បន្ទាប់ពីចំណាយពេលជាង៥ឆ្នាំ ដោយក្រុមអ្នកជំនាញជាតិ និងអន្តរជាតិ។

បដិមានេះមានកម្ពស់ប្រមាណ៥ម៉ែត្រ មានព្រះសិរ២ជាន់ ព្រះភក្ត្រ៥ និងព្រះហស្ថ១០ ត្រូវបានបង្កើតឡើងនៅសតវត្សទី១០ នៃគ្រិស្តសករាជ ហើយត្រូវបានចាត់ទុកថាជាបដិមាធំបំផុតមួយនៅកម្ពុជា និងក្នុងតំបន់អាស៊ីអាគ្នេយ៍ផងដែរ។

មុនពេលស្តារឡើងវិញ បដិមាព្រះសិវៈរាំនេះស្ថិតក្នុងសភាពបែកបាក់ជាច្រើនជាង១០,០០០បំណែក បណ្តាលមកពីអំពើលួចប្លន់ក្នុងអំឡុងសង្គ្រាមស៊ីវិល។ ចាប់ពីឆ្នាំ២០១២មក បំណែកទាំងនេះត្រូវបានប្រមូល រក្សាទុក និងចុះបញ្ជី ដើម្បីរៀបចំជាក្រុមតាមលក្ខណៈបច្ចេកទេស មុននឹងចាប់ផ្តើមដំណើរការស្តារយ៉ាងម៉ត់ចត់។

គម្រោងស្តារនេះដឹកនាំដោយអាជ្ញាធរជាតិព្រះវិហារ និងសាលាបារាំងចុងបូព៌ា សហការជាមួយអភិរក្សដ្ឋានអង្គរ និងអាជ្ញាធរជាតិអប្សរា ក្រោមការគាំទ្រពីALIPH។ រាល់ដំណាក់កាលត្រូវបានពិនិត្យ និងអនុម័តដោយគណៈកម្មាធិការបច្ចេកទេស ដើម្បីធានាថាការអភិរក្សគោរពតាមក្រមសីលធម៌វិជ្ជាជីវៈ និងមានភាពរឹងមាំយូរអង្វែង។

បច្ចុប្បន្ន បដិមាដ៏អស្ចារ្យនេះត្រូវបានតម្កល់បណ្តោះអាសន្ននៅអភិរក្សដ្ឋានអង្គរ ក្នុងក្រុងសៀមរាប ហើយពិធីអបអរសាទរបានប្រារព្ធឡើងនៅថ្ងៃទី១៨ ខែមីនា ឆ្នាំ២០២៦ ក្រោមវត្តមានដ៏ខ្ពង់ខ្ពស់របស់លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។

លោកជំទាវបានគូសបញ្ជាក់ថា ការស្តារបដិមាព្រះសិវៈរាំឱ្យរស់ឡើងវិញ គឺជាការស្តារឡើងវិញនូវព្រលឹងវប្បធម៌ និងជំនឿរបស់ជាតិខ្មែរ ដែលមានអាយុកាលជាងមួយពាន់ឆ្នាំ ហើយជាការតភ្ជាប់អតីតកាលដ៏រុងរឿងទៅកាន់បច្ចុប្បន្ន។

លោកជំទាវក៏បានបង្ហាញក្តីសង្ឃឹមថា បដិមាដ៏អស្ចារ្យនេះ នឹងត្រូវវិលត្រឡប់ទៅកាន់ទីតាំងដើមនៅតំបន់កោះកេរ្តិ៍វិញ នាពេលខាងមុខ ដើម្បីក្លាយជាទីសក្ការៈតាមជំនឿបុរាណ និងជាអត្ថប្រយោជន៍ដ៏សំខាន់ក្នុងការទាក់ទាញភ្ញៀវទេសចរអន្តរជាតិឱ្យកាន់តែច្រើនឡើង៕