ប្រុងប្រយ័ត្នខ្ពស់! អភិបាលខេត្តកណ្ដាលអំពាវនាវពលរដ្ឋការពារខ្លួនពីការបោកប្រាស់ Online ខណៈចែកប្លង់រឹងជាង១២ពាន់បណ្ណ

(កណ្ដាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានអំពាវនាវយ៉ាងខ្លាំងដល់ប្រជាពលរដ្ឋឲ្យមានការប្រុងប្រយ័ត្នខ្ពស់ចំពោះបទល្មើសបោកប្រាស់តាមប្រព័ន្ធបច្ចេកវិទ្យា (Online Scam) ដែលកំពុងកើនឡើង និងបង្កការប៉ះពាល់ដល់សុវត្ថិភាព និងទ្រព្យសម្បត្តិរបស់ប្រជាពលរដ្ឋ។

ឯកឧត្តមបានណែនាំឲ្យប្រជាពលរដ្ឋយកចិត្តទុកដាក់ជាពិសេស ក្នុងការជួលអគារ ផ្ទះ ឬកន្លែងស្នាក់នៅផ្សេងៗ ដល់ជនបរទេស ដោយត្រូវពិនិត្យឯកសារឲ្យបានច្បាស់លាស់ និងធ្វើកិច្ចសន្យាឲ្យត្រឹមត្រូវតាមច្បាប់ មុនពេលសម្រេចជួល ដើម្បីជៀសវាងហានិភ័យនានា រួមទាំងការផាកពិន័យពីអាជ្ញាធរ។

ជាមួយគ្នានេះ ឯកឧត្តមក៏បានជំរុញឲ្យប្រជាពលរដ្ឋ សង្កេតមើលសកម្មភាពគួរឱ្យសង្ស័យ ដូចជា ការស្នាក់នៅជាក្រុម មានការភ្ជាប់អ៊ីនធឺណិតទំហំធំ ឬមានសកម្មភាពមិនប្រក្រតីផ្សេងៗ ហើយសូមចូលរួមសហការផ្ដល់ព័ត៌មានជូនសមត្ថកិច្ចជាបន្ទាន់ ដើម្បីអាចចុះត្រួតពិនិត្យ និងបង្ក្រាបបានទាន់ពេលវេលា។

ការអំពាវនាវនេះ ត្រូវបានធ្វើឡើងក្នុងឱកាសដែល ឯកឧត្តម ឈឿន ប៊ុណ្ណារ័ត្ន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាលខេត្តកណ្ដាល អញ្ជើញជាគណៈអធិបតី ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) ចំនួន ១២,៤២៥បណ្ណ ជូនប្រជាពលរដ្ឋនៅស្រុកកៀនស្វាយ។

ប្លង់រឹងទាំងនេះ ត្រូវបានចែកជូនប្រជាពលរដ្ឋចំនួន ១២ភូមិ រួមមាន ភូមិរទាំង និងភូមិរទាំងត្បូង ក្នុងឃុំភូមិធំ ភូមិព្រែកត្រែង និងភូមិព្រែកត្រែង២ ភូមិសំរោងក្អែរ ភូមិសំរោងក្អែរ២ និងភូមិសំរោងក្អែរ៣ ក្នុងឃុំសំរោងធំ និងភូមិព្រែកដូង ភូមិកំពង់ស្វាយ ភូមិកំពង់ស្វាយ២ ភូមិព្រែកតានប់ និងភូមិព្រែកតានប់២ ក្នុងឃុំកំពង់ស្វាយ ស្រុកកៀនស្វាយ កាលពីព្រឹកថ្ងៃទី១៨ ខែមីនា ឆ្នាំ២០២៦។

ពិធីនេះមិនត្រឹមតែជាការផ្តល់សិទ្ធិកាន់កាប់ដីធ្លីស្របច្បាប់ជូនប្រជាពលរដ្ឋប៉ុណ្ណោះទេ ប៉ុន្តែថែមទាំងជាឱកាសសំខាន់ក្នុងការផ្សព្វផ្សាយច្បាប់ និងការពង្រឹងការយល់ដឹងអំពីសុវត្ថិភាពសង្គម ស្របតាមស្ថានភាពបច្ចុប្បន្នផងដែរ៕