កម្ពុជា លើកកម្ពស់សេវាសង្គម៖ ប្រារព្ធ “ទិវាសង្គមកិច្ចជាតិ” រៀងរាល់ឆ្នាំ បង្ហាញការប្តេជ្ញាចិត្តរឹងមាំចំពោះយុត្តិធម៌សង្គម

(ភ្នំពេញ)៖ រាជរដ្ឋាភិបាលកម្ពុជា បានសម្រេចយកទិវាសង្គមកិច្ចពិភពលោក ឱ្យក្លាយជាទិវាជាតិ ដែលត្រូវប្រារព្ធជារៀងរាល់ឆ្នាំនៅថ្ងៃទី១៩ ខែមីនា ដោយបង្ហាញពីការយកចិត្តទុកដាក់ និងការប្តេជ្ញាចិត្តដ៏មោះមុត ក្នុងការចូលរួមជាមួយសហគមន៍អន្តរជាតិ ដើម្បីលើកកម្ពស់សេវាសង្គមឱ្យកាន់តែល្អប្រសើរ ឆ្លើយតបទៅនឹងតម្រូវការពិតប្រាកដរបស់ជនរងគ្រោះ និងជនងាយរងគ្រោះ។

ក្នុងសារលិខិតអបអរទិវាជាតិសង្គមកិច្ចលើកទី២ និងទិវាសង្គមកិច្ចពិភពលោកលើកទី១៩ នាព្រឹកថ្ងៃទី១៨ ខែមីនា ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា ប្រធានបទឆ្នាំនេះ «រួមគ្នាកសាងក្តីសង្ឃឹម និងភាពសុខដុមរមនា» បានផ្តោតសំខាន់លើតួនាទីសេវាសង្គម ក្នុងការគាំទ្រតម្រូវការជាមូលដ្ឋាន និងការពង្រឹងអារម្មណ៍សុវត្ថិភាពតាមរយៈសាមគ្គីភាព និងការគាំទ្រគ្នាទៅវិញទៅមក។
សម្ដេចធិបតី បានបន្តថា កម្លាំងសេវាសង្គម គឺជាចំណុចស្នូលមួយសម្រាប់ការជួយជនរងគ្រោះ ដោយផ្អែកលើគុណតម្លៃ ក្រមសីលធម៌ ចំណេះដឹង និងជំនាញវិជ្ជាជីវៈ ដើម្បីធានាបាននូវប្រសិទ្ធភាព សក្តិសិទ្ធិភាព និងបរិយាបន្នក្នុងការផ្តល់សេវា។

ការប្រារព្ធទិវានេះ ក៏ជាការចូលរួមរួមគ្នាកសាងសង្គមមួយដែលពោរពេញដោយក្តីមេត្តា សេចក្តីស្រឡាញ់ សន្តិភាព និងសាមគ្គីភាព ដោយមានគោលដៅពង្រឹងសុខុមាលភាពសង្គមឱ្យបានរឹងមាំ និងចីរភាពសម្រាប់ប្រជាពលរដ្ឋគ្រប់រូប។

នៅក្នុងន័យនេះ រាជរដ្ឋាភិបាល នីតិកាលទី៧ បានបន្តយកចិត្តទុកដាក់លើការពារសន្តិភាព និងស្ថិរភាពសង្គម ជាគ្រឹះសម្រាប់ការអភិវឌ្ឍ និងការឆ្លើយតបទៅនឹងបញ្ហាប្រឈមនានា ក្នុងបរិបទសេដ្ឋកិច្ច និងសង្គមសកលដែលកំពុងផ្លាស់ប្តូរយ៉ាងឆាប់រហ័ស។ដើម្បីសម្រេចគោលដៅនេះ រាជរដ្ឋាភិបាលបានដាក់ចេញយុទ្ធសាស្ត្របញ្ចកោណ ដំណាក់កាលទី១ ដែលផ្តោតលើ កំណើន ការងារ សមធម៌ ប្រសិទ្ធភាព និងចីរភាព ព្រមទាំងកំណត់អាទិភាពគន្លឹះ ៥ រួមមាន មនុស្ស ផ្លូវ ទឹក ភ្លើង និងបច្ចេកវិទ្យា ដែលជាគន្លឹះសម្រាប់ការកសាងមូលធនមនុស្ស និងអភិវឌ្ឍសង្គមជាតិ។

ជាមួយគ្នានេះ រាជរដ្ឋាភិបាលក៏បានដាក់ឱ្យអនុវត្តច្បាប់ និងគោលនយោបាយសង្គមជាច្រើន ដូចជា ច្បាប់ស្តីពីយុត្តិធម៌អនីតិជន ច្បាប់ស្តីពីស្មុំកូនអន្តរប្រទេស និងច្បាប់ការពារសិទ្ធិជនពិការ រួមទាំងគោលនយោបាយជាតិគាំពារសង្គម និងការពារកុមារ ដើម្បីធានាបាននូវការគាំពារយ៉ាងទូលំទូលាយសម្រាប់ក្រុមជនងាយរងគ្រោះ។

បន្ថែមពីនេះ ការអភិវឌ្ឍធនធានមនុស្សក្នុងវិស័យសង្គមកិច្ច ក៏ត្រូវបានយកចិត្តទុកដាក់យ៉ាងខ្លាំង ដោយមានគ្រឹះស្ថានអប់រំជាច្រើនកំពុងបណ្តុះបណ្តាលអ្នកជំនាញសង្គមកិច្ចជារៀងរាល់ឆ្នាំ។

ជាក់ស្តែង ក្រសួងសង្គមកិច្ច អតីតយុទ្ធជន និងយុវនីតិសម្បទា បានដាក់ចេញគោលការណ៍ណែនាំស្តីពីសមត្ថភាពមូលដ្ឋានសម្រាប់កម្លាំងសេវាសង្គម និងកំពុងរៀបចំបង្កើតគណៈវិជ្ជាជីវៈសង្គមកិច្ច ដើម្បីគ្រប់គ្រង និងលើកកម្ពស់គុណភាពសេវាសង្គមនៅកម្ពុជា។ទាំងនេះ សុទ្ធតែបង្ហាញពីចក្ខុវិស័យច្បាស់លាស់ និងការប្តេជ្ញាចិត្តរបស់រាជរដ្ឋាភិបាល ក្នុងការធានាថា ប្រជាពលរដ្ឋគ្រប់រូប ទទួលបានសិទ្ធិ សេរីភាព សមភាព និងសុវត្ថិភាព ដោយមិនបោះបង់នរណាម្នាក់ចោលឡើយ៕