ចិនផ្តល់សម្ភារៈបច្ចេកទេសជូនកម្ពុជា ពង្រឹងប្រតិបត្តិការបង្ក្រាប Online Scams

(ភ្នំពេញ)៖ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) នាព្រឹកថ្ងៃទី១៦ ខែមីនា ឆ្នាំ២០២៦ បានរៀបចំពិធីប្រគល់-ទទួលសម្ភារៈបច្ចេកទេស ដែលផ្តល់ជូនដោយក្រសួងសន្តិសុខសាធារណៈនៃសាធារណរដ្ឋប្រជាមានិតចិន តាមរយៈស្ថានទូតចិនប្រចាំកម្ពុជា ដើម្បីគាំទ្រដល់ប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams)។

ក្នុងពិធីនោះ ឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រី អនុប្រធានប្រចាំការ និងជាប្រធានលេខាធិការដ្ឋាន គ.ប.ឆ.ប. បានថ្លែងអំណរគុណចំពោះភាគីចិនដែលបានផ្តល់ការគាំទ្រដ៏មានតម្លៃនេះ ក្នុងក្របខណ្ឌកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន។ ឯកឧត្តមបានបញ្ជាក់ថា ការគាំទ្រនេះជាសក្ខីភាពបង្ហាញពីមិត្តភាពដែកថែបកម្ពុជា–ចិន និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។

ឯកឧត្តមសន្តិបណ្ឌិតបានគូសបញ្ជាក់ថា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី រាជរដ្ឋាភិបាលកម្ពុជា បានដាក់ចេញវិធានការយ៉ាងតឹងរឹងដើម្បីបោសសម្អាតបទល្មើស Online Scams ខណៈយុទ្ធនាការបង្ក្រាបកំពុងបន្តអនុវត្តនៅទូទាំងប្រទេស។ ជាមួយគ្នានេះ សេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលត្រូវបានអនុម័តដោយកិច្ចប្រជុំពេញអង្គគណៈរដ្ឋមន្ត្រី ក៏នឹងក្លាយជាមូលដ្ឋានច្បាប់ដ៏រឹងមាំសម្រាប់ទប់ស្កាត់ និងបង្ក្រាបបទល្មើសនេះ។

ឯកឧត្តមបានបន្ថែមថា បទល្មើសឆបោកតាមប្រព័ន្ធបច្ចេកវិទ្យា ជាបញ្ហាស្មុគស្មាញកម្រិតតំបន់ និងសកល ដែលទាមទារឱ្យមានកិច្ចសហប្រតិបត្តិការអន្តរជាតិយ៉ាងជិតស្និទ្ធ។ ក្នុងន័យនេះ សមត្ថកិច្ចកម្ពុជា និងចិន កំពុងសហការគ្នាយ៉ាងសកម្ម ដើម្បីបង្ក្រាបឧក្រិដ្ឋកម្មឆ្លងដែន និងធានាសន្តិសុខសណ្តាប់ធ្នាប់សាធារណៈ។

ក្នុងឱកាសដូចគ្នា ឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានលើកឡើងថា ការផ្តល់សម្ភារៈបច្ចេកទេសនេះ នឹងជួយគាំទ្រដល់ប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យាឱ្យកាន់តែមានប្រសិទ្ធភាព។ ឯកឧត្តមក៏បានវាយតម្លៃខ្ពស់ចំពោះវិធានការដ៏ម៉ឺងម៉ាត់របស់រាជរដ្ឋាភិបាលកម្ពុជា និងសមិទ្ធផលនានាដែលសម្រេចបានក្នុងការបង្ក្រាបបណ្តាញឆបោកនៅទូទាំងប្រទេស។

ឯកឧត្តមបានបញ្ជាក់ថា កម្ពុជា និងចិនជាមិត្តដែកថែប ដែលតែងតែជួយគ្នាទៅវិញទៅមក ហើយភាគីចិនក៏មានឆន្ទៈបន្តសហការយ៉ាងជិតស្និទ្ធជាមួយកម្ពុជា ក្នុងការស៊ើបអង្កេត និងបង្ក្រាបឧក្រិដ្ឋកម្មឆ្លងដែន ដើម្បីលុបបំបាត់បណ្តាញឆបោកតាមប្រព័ន្ធបច្ចេកវិទ្យា និងការពារសុវត្ថិភាពប្រជាជន។

ជាមួយគ្នានេះ រាជរដ្ឋាភិបាលកម្ពុជាក៏បានប្តេជ្ញាចិត្តបន្តអនុវត្តវិធានការយ៉ាងម៉ឺងម៉ាត់ ដើម្បីបោសសម្អាតបទល្មើសឆបោកតាមប្រព័ន្ធបច្ចេកវិទ្យា ឱ្យអស់ពីកម្ពុជា និងបង្កើតបរិយាកាសសុវត្ថិភាពសម្រាប់សង្គម និងការអភិវឌ្ឍជាតិ៕