កម្ពុជា–អូស្ត្រាលី សម្ពោធមជ្ឈមណ្ឌលឧត្តមភាពយានយន្ត “ACE-C” លើកកម្ពស់ជំនាញយុវជនឆ្ពោះទៅសេដ្ឋកិច្ចទំនើប

(ភ្នំពេញ)៖ នាព្រឹកថ្ងៃទី១៦ ខែមីនា ឆ្នាំ២០២៦ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Bridget Collier ភារធារីស្ថានទូតអូស្ត្រាលីប្រចាំកម្ពុជា បានអញ្ជើញជាអធិបតីក្នុងពិធីសម្ពោធជាផ្លូវការមជ្ឈមណ្ឌលឧត្តមភាពយានយន្តនៅកម្ពុជា (ACE-C) ឬ “អេស ខេមបូឌា” ដែលជាគំនិតផ្តួចផ្តើមសំខាន់មួយក្រោមភាពជាដៃគូរវាងក្រសួងការងារ និងវិទ្យាស្ថាន Bendigo Kangan Institute (BKI) ដោយមានការគាំទ្រពីរដ្ឋាភិបាលអូស្ត្រាលី។

ក្នុងឱកាសនោះ ឯកឧត្តម ហេង សួរ បានសម្តែងការអបអរសាទរ និងវាយតម្លៃខ្ពស់ចំពោះការបង្កើតមជ្ឈមណ្ឌលនេះ ដោយបញ្ជាក់ថា ការបើកដំណើរការ “អេស ខេមបូឌា” មិនត្រឹមតែពង្រឹងកិច្ចសហប្រតិបត្តិការរវាងកម្ពុជា និងអូស្ត្រាលីប៉ុណ្ណោះទេ ប៉ុន្តែជាជំហានសំខាន់ក្នុងការអភិវឌ្ឍជំនាញ និងការរៀនសូត្រពេញមួយជីវិត ស្របតាមយុទ្ធសាស្ត្របញ្ចកោណដំណាក់កាលទី១ ក្រោមចក្ខុវិស័យរបស់ សម្តេចធិបតី ហ៊ុន ម៉ាណែត ដែលបានលើកឡើងថា “ប្រជាជន គឺជាទ្រព្យសម្បត្តិដ៏ធំបំផុតរបស់កម្ពុជា”។

មជ្ឈមណ្ឌលនេះនឹងក្លាយជាវេទិកាឈានមុខសម្រាប់ការបណ្តុះបណ្តាលជំនាញយានយន្តជាក់ស្តែង ដោយផ្តោតលើគោលដៅសំខាន់៥ រួមមាន ការពង្រឹងជំនាញ និងបង្កើតជំនាញថ្មី, នវានុវត្តន៍ និងគម្រោងសាកល្បង, ការបំប្លែងឌីជីថលក្នុងវិស័យ TVET, ការសម្របសម្រួលគោលនយោបាយ និងការផ្ទេរចំណេះដឹងបច្ចេកវិទ្យា។ ការរួមបញ្ចូលកម្មវិធីសិក្សារបស់ BKI ជាមួយបច្ចេកវិទ្យាឧស្សាហកម្មទំនើបពីក្រុមហ៊ុន RMA Cambodia ក៏នឹងជួយបង្កើតមជ្ឈមណ្ឌលគំរូសម្រាប់ការវិភាគវិនិច្ឆ័យយានយន្តអគ្គិសនី និងសុវត្ថិភាព ព្រមទាំងធានាថា សិស្សបញ្ចប់ការសិក្សាមានសមត្ថភាពចូលធ្វើការបានភ្លាមៗ។

ជាមួយគ្នានេះ លោកស្រី Bridget Collier បានលើកឡើងថា មជ្ឈមណ្ឌលនេះជាជំហានថ្មីក្នុងកិច្ចសហប្រតិបត្តិការយូរអង្វែងរវាងអូស្ត្រាលី និងកម្ពុជា ក្នុងវិស័យអប់រំ និងការអភិវឌ្ឍធនធានមនុស្ស ខណៈកម្ពុជាកំពុងឆ្ពោះទៅរកសេដ្ឋកិច្ចពហុវិស័យ និងឧស្សាហកម្មកម្រិតខ្ពស់ ដែលតម្រូវឱ្យមានកម្លាំងពលកម្មជំនាញកាន់តែច្រើន។

មន្ត្រី និងដៃគូពាក់ព័ន្ធ រួមមានលោកស្រី Sharan Burrow ប្រធានក្រុមប្រឹក្សាវិទ្យាស្ថាន BKI, លោក ងន សាំង អគ្គនាយកក្រុមហ៊ុន RMA Cambodia និងលោក វ៉ាន់ វិចិត្រ ដេវីត នាយកមជ្ឈមណ្ឌល អេស ខេមបូឌា បានបញ្ជាក់ដូចគ្នាថា មជ្ឈមណ្ឌលនេះនឹងជួយគាំទ្រសិស្សរាប់ពាន់នាក់ក្នុងការកសាងជំនាញ បង្កើនឱកាសអាជីព និងជំរុញការរីកចម្រើនរបស់វិស័យយានយន្ត និងផលិតកម្មនៅកម្ពុជា។

ក្នុងឱកាសដ៏មានអត្ថន័យនេះ ឯកឧត្តមរដ្ឋមន្ត្រី ហេង សួរ ក៏បានថ្លែងអំណរគុណចំពោះឯកអគ្គរដ្ឋទូតអូស្ត្រាលី Derek Yip និងដៃគូអភិវឌ្ឍន៍ទាំងអស់ ដែលបានរួមចំណែកក្នុងការបង្កើតគំរូភាពជាដៃគូរដ្ឋ-ឯកជន (PPP) ដើម្បីពង្រឹងសមត្ថភាពធនធានមនុស្ស និងលើកកម្ពស់ភាពធន់នៃសេដ្ឋកិច្ចកម្ពុជា៕