លោកស្នងការ ឈឿន សុចិត្ត អញ្ជើញចូលរួមកិច្ចប្រជុំតាមដានវឌ្ឍនភាពបង្ក្រាបបទល្មើស Online Scams

(កណ្តាល)៖ នៅរសៀលថ្ងៃចន្ទ ទី១៦ ខែមីនា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញចូលរួមកិច្ចប្រជុំប្រចាំសប្តាហ៍ ដើម្បីតាមដានវឌ្ឍនភាពការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ដែលធ្វើឡើងតាមប្រព័ន្ធ ZOOM នៅសាលប្រជុំសាលាខេត្តកណ្តាល។

កិច្ចប្រជុំនេះ បានប្រព្រឹត្តទៅក្រោមសហអធិបតីភាពដ៏ខ្ពង់ខ្ពស់ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការចូលរួមពីថ្នាក់ដឹកនាំ និងមន្ត្រីពាក់ព័ន្ធពីបណ្ដារាជធានី-ខេត្ត។

កិច្ចប្រជុំនេះ មានគោលបំណងពិនិត្យវាយតម្លៃលទ្ធផលការងារកន្លងមក និងពង្រឹងវិធានការបង្ការ បង្ក្រាបបទល្មើសឆបោកតាមប្រព័ន្ធបច្ចេកវិទ្យា ដែលកំពុងក្លាយជាបញ្ហាប្រឈមមួយក្នុងសង្គម ដើម្បីធានាបាននូវសន្តិសុខ សុវត្ថិភាព និងការពារប្រជាពលរដ្ឋពីការចាញ់បោកតាមប្រព័ន្ធអនឡាញ។

ទន្ទឹមនឹងនេះ ថ្នាក់ដឹកនាំក៏បានណែនាំឱ្យអង្គភាពពាក់ព័ន្ធបន្តសហការយ៉ាងជិតស្និទ្ធ និងពង្រឹងការអនុវត្តវិធានការបង្ក្រាបឱ្យកាន់តែមានប្រសិទ្ធភាព ដើម្បីទប់ស្កាត់ និងបង្ក្រាបបទល្មើស Online Scams ឱ្យបានទាន់ពេលវេលា៕