ជប៉ុន–កម្ពុជា រួមគ្នាពង្រឹងប្រព័ន្ធភស្តុភារកម្ម! ក្រសួងសាធារណការ រៀបចំសិក្ខាសាលាឆ្ពោះទៅរកភាពធន់ និងនិរន្តរភាព

(ភ្នំពេញ)៖ ក្រសួងសាធារណការ និងដឹកជញ្ជូន បានរៀបចំសិក្ខាសាលាស្តីពី «ការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ឆ្ពោះទៅរកភាពធន់ និងនិរន្តរភាព» ដើម្បីពិភាក្សាអំពីបញ្ហាប្រឈម និងទិសដៅអភិវឌ្ឍវិស័យភស្តុភារកម្មនៅកម្ពុជា។

សិក្ខាសាលានេះបានប្រព្រឹត្តទៅនាព្រឹកថ្ងៃចន្ទ ទី១៦ ខែមីនា ឆ្នាំ២០២៦ ក្រោមអធិបតីភាពឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ដោយមានការចូលរួមពីលោក SANUI Kazumasa ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំកម្ពុជា ព្រមទាំងថ្នាក់ដឹកនាំក្រសួង តំណាងស្ថានទូតជប៉ុន សាស្ត្រាចារ្យពីវិទ្យាស្ថានវិទ្យាសាស្ត្រតូក្យូ ក្រសួងស្ថាប័នពាក់ព័ន្ធ និងតំណាងវិស័យឯកជនជាច្រើនរូប។

សិក្ខាសាលានេះមានគោលបំណងបង្កើតវេទិកាសម្រាប់ការពិភាក្សា និងផ្លាស់ប្តូរយោបល់អំពីការកែលម្អប្រព័ន្ធភស្តុភារកម្មនៅកម្ពុជា ដើម្បីបង្កើនប្រសិទ្ធភាព និងភាពធន់នៃខ្សែសង្វាក់ផ្គត់ផ្គង់ ទាំងក្នុងវិស័យសាធារណៈ និងវិស័យឯកជន។

ក្នុងឱកាសនេះ អ្នកជំនាញ និងវាគ្មិនកិត្តិយសក៏បានចែករំលែកបទពិសោធន៍ និងឧត្តមានុវត្តន៍ល្អៗ ដើម្បីជំរុញការអភិវឌ្ឍវិស័យភស្តុភារកម្មឱ្យកាន់តែប្រសើរ និងមាននិរន្តរភាព ស្របតាមការរីកចម្រើនសេដ្ឋកិច្ច និងការតភ្ជាប់ក្នុងតំបន់របស់កម្ពុជា៕