មិនទុកគ្រួសារវីរកងទ័ពឱ្យនៅឯកោ! លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រគល់ផ្ទះថ្មី ៣ខ្នង ជូនក្រុមគ្រួសារវីរកងទ័ពពលី

(ភ្នំពេញ-កណ្តាល)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅថ្ងៃទី១៦ ខែមីនា ឆ្នាំ២០២៦នេះ បានអញ្ជើញប្រគល់ផ្ទះថ្មីចំនួន៣ខ្នង ជូនដល់ក្រុមគ្រួសារវីរកងទ័ពពលី ដើម្បីជួយសម្រួលជីវភាពរស់នៅក្រោយការលះបង់ដ៏អង់អាចរបស់វីរកងទ័ព។ ក្នុងនោះ ផ្ទះ២ខ្នង ស្ថិតនៅក្រុងតាខ្មៅ ខេត្តកណ្តាល និងផ្ទះ១ខ្នងទៀត ស្ថិតនៅខណ្ឌព្រែកព្នៅ រាជធានីភ្នំពេញ។

ក្នុងឱកាសនោះ លោកជំទាវបណ្ឌិតបានពាំនាំប្រសាសន៍ចូលរួមរំលែកមរណទុក្ខ និងសួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្តេចមហាបវរធិបតី ហ៊ុន ម៉ាណែត ជូនដល់ក្រុមគ្រួសារវីរកងទ័ពពលីផងដែរ។

ជាមួយគ្នានេះ លោកជំទាវបណ្ឌិត ក៏បាននាំយកអំណោយពីសម្តេចធិបតី និងលោកជំទាវបណ្ឌិត រួមមានថវិកា សម្ភារៈប្រើប្រាស់ និងគ្រឿងឧបភោគបរិភោគ ជូនដល់ក្រុមគ្រួសារ ដើម្បីជួយសម្រួលដល់ជីវភាពប្រចាំថ្ងៃ។

លោកជំទាវបណ្ឌិតបានបញ្ជាក់ថា ការលះបង់របស់វីរកងទ័ព គឺជាវីរភាពដែលប្រជាជនកម្ពុជាមិនអាចបំភ្លេចបាន ហើយរាជរដ្ឋាភិបាលតែងតែគិតគូរយកចិត្តទុកដាក់ចំពោះក្រុមគ្រួសារវីរកងទ័ព ដោយមិនទុកឱ្យនរណាម្នាក់នៅឯកោឡើយ៕