ស្នងការថ្មីដឹកនាំមន្ត្រីគោរពទង់ជាតិ លើកទឹកចិត្តពង្រឹងវិន័យ និងការពារសន្តិសុខក្នុងខេត្តបន្ទាយមានជ័យ

(បន្ទាយមានជ័យ)៖ នៅព្រឹកថ្ងៃចន្ទ ទី១៦ ខែមីនា ឆ្នាំ២០២៦ លោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដឹកនាំកម្លាំងនគរបាលទូទាំងខេត្ត ចូលរួមពិធីគោរពទង់ជាតិនៃព្រះរាជាណាចក្រកម្ពុជា។

ពិធីនេះមានការចូលរួមពី លោក-លោកស្រី ឧត្តមសេនីយ៍ វរសេនីយ៍ ស្នងការរង នាយការិយាល័យជំនាញ និងមន្ត្រីនគរបាលជាច្រើនរូប ចំណុះស្នងការដ្ឋាននគរបាលខេត្តបន្ទាយមានជ័យ។

ក្នុងឱកាសនោះ លោកឧត្តមសេនីយ៍ស្នងការ បានថ្លែងមតិស្វាគមន៍ក្នុងថ្ងៃគោរពទង់ជាតិលើកដំបូង បន្ទាប់ពីប្រកាសចូលកាន់តំណែង ដោយបានជំរុញឱ្យកម្លាំងនគរបាលទាំងអស់ រួមគ្នាពង្រឹងសាមគ្គីភាព គោរពវិន័យនគរបាលជាតិ ផ្តល់សេវារដ្ឋបាលជូនប្រជាពលរដ្ឋឱ្យបានទាន់ពេលវេលា ព្រមទាំងពង្រឹងការទប់ស្កាត់ បង្ការ និងបង្ក្រាបបទល្មើសគ្រប់ប្រភេទ និងក្មេងទំនើង ដើម្បីធានាសន្តិសុខ សណ្តាប់ធ្នាប់ និងសុវត្ថិភាពជូនប្រជាពលរដ្ឋទូទាំងខេត្ត៕