ឯកឧត្តម ប្រាក់ សុខុន ជួបពិភាក្សាជាមួយ ឯកឧត្តម Milton Dick ដើម្បីលើកកម្ពស់ទំនាក់ទំនងកម្ពុជា–អូស្ត្រាលី

នៅព្រឹកថ្ងៃទី១៦ ខែមីនា ឆ្នាំ២០២៦ ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានអញ្ជើញចូលជួបសម្តែងការគួរសមជាមួយ ឯកឧត្តម Milton Dick ប្រធានរដ្ឋសភានៃ Australia។

ក្នុងជំនួបនេះ ឯកឧត្តមឧបនាយករដ្ឋមន្ត្រីបានថ្លែងអំណរគុណចំពោះ ឯកឧត្តមប្រធានរដ្ឋសភា ដែលបានអនុញ្ញាតឱ្យមានជំនួបសម្តែងការគួរសមនេះឡើង ទោះបីជាក្នុងអំឡុងសប្តាហ៍សម្រាកពីសម័យប្រជុំរដ្ឋសភា (Non-sitting week) ក៏ដោយ ដែលបង្ហាញពីការយកចិត្តទុកដាក់ និងការផ្តល់សារៈសំខាន់ខ្ពស់របស់អូស្ត្រាលី ចំពោះទំនាក់ទំនងទ្វេភាគីជាមួយកម្ពុជា។

ឯកឧត្តម ប្រាក់ សុខុន ក៏បានសង្កត់ធ្ងន់លើតម្លៃនៃការធ្វើការទូតសភា ដែលជាគំនិតផ្តួចផ្តើមរបស់ សម្ដេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដើម្បីជាយន្តការពង្រឹង និងលើកកម្ពស់ទំនាក់ទំនងទ្វេភាគីកម្ពុជា–អូស្ត្រាលី ឱ្យកាន់តែរឹងមាំ និងមានប្រសិទ្ធភាពបន្ថែមទៀត។

ក្នុងឱកាសនោះ ភាគីទាំងពីរ ក៏បានផ្លាស់ប្តូរទស្សនៈគ្នាទៅវិញទៅមកលើវឌ្ឍនភាពថ្មីៗនៃស្ថានភាពព្រំដែនរវាង កម្ពុជា និង ថៃ ព្រមទាំងបញ្ហាតំបន់ និងអន្តរជាតិផ្សេងៗដែលជាកង្វល់រួមផងដែរ។

បន្ទាប់ពីជំនួបពិភាក្សាប្រកបដោយផ្លែផ្កា ឯកឧត្តមឧបនាយករដ្ឋមន្ត្រី ក៏បានអញ្ជើញទស្សនាបរិវេណនៃរដ្ឋសភា Australia ផងដែរ៕