យុវជនជាង៣០០នាក់ ចូលរួមកម្មវិធី «មនសិការពលរដ្ឋល្អ» លើកទី២ នៅខេត្តកណ្តាល ពង្រឹងចំណេះដឹង ប្រវត្តិសាស្ត្រ និងសីលធម៌

(កណ្តាល)៖ រដ្ឋបាលស្រុកពញាឮសហការជាមួយមន្ទីរ-អង្គភាពពាក់ព័ន្ធ និងសហភាពសហព័ន្ធយុវជនកម្ពុជាខេត្តកណ្តាល នៅរសៀលថ្ងៃទី១៥ ខែមីនា ឆ្នាំ២០២៦ បានរៀបចំកម្មវិធី «មនសិការពលរដ្ឋល្អ» លើកទី២ ជូនសិស្សានុសិស្ស និងគ្រូបង្គោលពីវិទ្យាល័យចំនួន២ សរុបប្រមាណ៣៣០នាក់។

វិទ្យាល័យដែលចូលរួមរួមមាន៖ វិទ្យាល័យ ហ៊ុន សែន សេរីភាព ក្រុងតាខ្មៅ និងវិទ្យាល័យ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើមឫស ស្រុកកណ្ដាលស្ទឹង។ កម្មវិធីនេះក៏មានការចូលរួមពីលោកជំទាវ ស្រូយ សុជាតិ អគ្គនាយកនៃអគ្គនាយកដ្ឋានយុវជន ក្រសួងអប់រំ យុវជន និងកីឡា និងលោក ភឹម ម៉ាដូណា អភិបាលរងស្រុកពញាឮ ផងដែរ។

ក្នុងឱកាសចុះទស្សនកិច្ចសិក្សានៅភ្នំព្រះរាជទ្រព្យ (ឧដុង្គ) និងពុទ្ធមណ្ឌលវិប្បសនាធុរៈ លោក ភឹម ម៉ាដូណា បានបញ្ជាក់ថា ការចុះសិក្សាក្រៅថ្នាក់នេះ គឺជាសកម្មភាពអប់រំដ៏សំខាន់ ដែលជួយឱ្យសិស្សភ្ជាប់ចំណេះដឹងពីសៀវភៅទៅជីវិតពិត ស្វែងយល់ពីប្រវត្តិសាស្ត្រខ្មែរ បេតិកភណ្ឌវប្បធម៌ និងការអប់រំចិត្តតាមបែបព្រះពុទ្ធសាសនា។
លោកបានបន្ថែមថា កម្មវិធី «មនសិការពលរដ្ឋល្អ» មានគោលបំណងបណ្តុះសីលធម៌ សុចរិតភាព ទំនួលខុសត្រូវ និងលើកទឹកចិត្តឱ្យយុវជនចូលរួមសកម្មក្នុងកិច្ចការសង្គម។ កម្មវិធីនេះក៏ផ្តោតលើការបណ្តុះគំនិតច្នៃប្រឌិត ជំនាញភាពជាអ្នកដឹកនាំ និងជួយឱ្យយុវជនធ្វើសេចក្តីសម្រេចចិត្តត្រឹមត្រូវក្នុងការជ្រើសរើសអាជីពនាពេលអនាគត។

តាមការបញ្ជាក់ដដែល ការចូលរួមរបស់យុវជនក្នុងសកម្មភាពស្ម័គ្រចិត្ត ការងារសង្គម និងការអនុវត្តតួនាទីជាពលរដ្ឋល្អ គឺជាផ្នែកសំខាន់ក្នុងការកសាងធនធានមនុស្ស ដែលមានសមត្ថភាព មនសិការស្នេហាជាតិ និងរួមចំណែកអភិវឌ្ឍសង្គមជាតិឱ្យមានចីរភាព វិបុលភាព និងភាពសុខុមដុមនា៕