ស្ថានភាពគ្រោះថ្នាក់ចរាចរណ៍១ថ្ងៃ! ស្លាប់៣នាក់ របួស១៣នាក់ ខណៈសមត្ថកិច្ចពិន័យយានយន្ត៣៣៨គ្រឿង

(ភ្នំពេញ)៖ ក្នុងរយៈពេល២៤ម៉ោង ចាប់ពីម៉ោង១៤:០០ ថ្ងៃទី១៤ ខែមីនា ដល់ម៉ោង១៤:០០ ថ្ងៃទី១៥ ខែមីនា ឆ្នាំ២០២៦ ស្ថានភាពគ្រោះថ្នាក់ចរាចរណ៍នៅទូទាំងប្រទេស បានកើតឡើងចំនួន ៧ករណី ក្នុងនោះកើតឡើងនៅពេលយប់ ៦ករណី បណ្ដាលឲ្យមនុស្ស ស្លាប់៣នាក់ (ស្រី១នាក់) និង របួស១៣នាក់ ក្នុងនោះរបួសធ្ងន់ ១០នាក់។

របាយការណ៍បានបញ្ជាក់ថា មូលហេតុសំខាន់ៗដែលបង្កគ្រោះថ្នាក់រួមមាន បើកបរល្បឿនលឿន៣ករណី មិនប្រកាន់ស្ដាំ២ករណី មិនគោរពសញ្ញាចរាចរណ៍១ករណី និងងងុយ១ករណី។

ក្នុងចំណោមករណីទាំងនេះ ខេត្ត កំពង់ឆ្នាំង រតនគិរី និងស្វាយរៀង មានមនុស្សស្លាប់មួយករណីក្នុងមួយខេត្ត ខណៈរាជធានីភ្នំពេញមានគ្រោះថ្នាក់ ៣ករណី បណ្ដាលឲ្យមនុស្ស របួស៩នាក់។ ចំណែកខេត្ត កំពង់ស្ពឺ ក៏មានគ្រោះថ្នាក់ ១ករណី បណ្ដាលឲ្យរបួស ១នាក់។

ជាមួយគ្នានេះ សមត្ថកិច្ចបានបន្តរឹតបន្តឹងការអនុវត្តច្បាប់ចរាចរណ៍ ដោយបាន ផាកពិន័យយានយន្តសរុប ៣៣៨គ្រឿង ក្នុងនោះ ម៉ូតូ២០៣គ្រឿង និងរថយន្ត១៣៥គ្រឿង នៅតាមរាជធានី–ខេត្តមួយចំនួន។

បន្ថែមពីនេះ កម្លាំងជំនាញក៏បានធ្វើការផ្សព្វផ្សាយអប់រំអំពីសុវត្ថិភាពចរាចរណ៍ចំនួន ៩៧លើក ដល់ប្រជាពលរដ្ឋសរុប ៣,២២៩នាក់ តាមវេទិកាសាធារណៈ គ្រឹះស្ថានអប់រំ និងសកម្មភាពផ្សេងៗ ដើម្បីលើកកម្ពស់ការយល់ដឹង និងកាត់បន្ថយគ្រោះថ្នាក់ចរាចរណ៍នៅលើដងផ្លូវ។

សមត្ថកិច្ចក៏បានអំពាវនាវឲ្យអ្នកប្រើប្រាស់ផ្លូវទាំងអស់ គោរពច្បាប់ចរាចរណ៍ បើកបរដោយប្រុងប្រយ័ត្ន និងជៀសវាងការបើកបរល្បឿនលឿន ឬក្នុងស្ថានភាពងងុយ ដើម្បីការពារសុវត្ថិភាពជីវិត និងទ្រព្យសម្បត្តិរបស់ខ្លួន និងអ្នកដទៃ៕