វីដេអូវាយមិត្តរួមថ្នាក់ផ្ទុះលើបណ្តាញសង្គម! យុវតី៣នាក់អាយុក្រោម១៤ឆ្នាំ ត្រូវបញ្ជូនសំណុំរឿងទៅតុលាការ

(ភ្នំពេញ)៖ ករណីយុវតី៣នាក់ប្រើហិង្សាលើយុវតីម្នាក់ជាមិត្តរួមថ្នាក់ កំពុងក្លាយជាប្រធានបទក្តៅលើបណ្តាញសង្គម បន្ទាប់ពីវីដេអូសកម្មភាពនេះត្រូវបានចែករំលែកយ៉ាងទូលំទូលាយនៅព្រឹកថ្ងៃទី១៤ ខែមីនា ឆ្នាំ២០២៦ បង្កឲ្យមានការវែកញែកពីមហាជនរាប់ម៉ឺននាក់។

តាមព័ត៌មានបានឲ្យដឹងថា ហេតុការណ៍នេះកើតឡើងកាលពីថ្ងៃទី២១ ខែមករា ឆ្នាំ២០២៦ នៅវិទ្យាល័យព្រះយុគន្ធរ ស្ថិតក្នុងសង្កាត់បឹងកេងកង២ ខណ្ឌបឹងកេងកង រាជធានីភ្នំពេញ។ យុវតីរងគ្រោះអាយុ១៣ឆ្នាំ ត្រូវបានមិត្តរួមថ្នាក់៣នាក់ (អាយុ១៣ឆ្នាំ២នាក់ និង១២ឆ្នាំ ១នាក់) ប្រើហិង្សា ដោយចោទថា​បានញុះញង់ឲ្យពួកគេឈ្លោះប្រកែកគ្នា។

ក្រោយកើតហេតុ ប្រហែលកន្លះខែក្រោយ នៅថ្ងៃទី០៦ ខែកុម្ភៈ ឆ្នាំ២០២៦ ម្តាយយុវតីរងគ្រោះបាននាំកូនទៅដាក់ពាក្យបណ្តឹងនៅអាវុធហត្ថរាជធានីភ្នំពេញ។ បន្ទាប់ពីទទួលបណ្តឹង មន្ត្រីជំនាញនៃការិយាល័យប្រឆាំងការជួញដូរមនុស្ស និងការពារអនីតិជន បានកោះហៅភាគីជនសង្ស័យទាំង៣នាក់ រួមទាំងអាណាព្យាបាល មកសាកសួរពាក់ព័ន្ធនឹងហេតុការណ៍។

លុះដល់ថ្ងៃទី០៥ ខែមីនា ឆ្នាំ២០២៦ យុវតីទាំង៣នាក់បានចូលខ្លួនមកឆ្លើយបំភ្លឺ និងសារភាពអំពីកំហុសរបស់ខ្លួន។ ប៉ុន្តែដោយសារពួកគេជាអនីតិជនអាយុក្រោម១៤ឆ្នាំ តាមច្បាប់ស្តីពីយុត្តិធម៌អនីតិជន មាត្រា១៤ មិនអនុញ្ញាតឲ្យឃាត់ខ្លួនឡើយ។ ដូច្នេះសមត្ថកិច្ចបានប្រគល់យុវតីទាំង៣នាក់ឲ្យអាណាព្យាបាលធានាយកត្រលប់ទៅលំនៅដ្ឋានវិញ ខណៈសំណុំរឿងត្រូវបានកសាងបញ្ជូនទៅតុលាការ ដើម្បីចាត់ការបន្តតាមនីតិវិធី។

ជាមួយគ្នានេះ សមត្ថកិច្ចក៏បានអំពាវនាវដល់មហាជន ឲ្យបញ្ចេញមតិដោយគោរពច្បាប់ និងសីលធម៌សង្គម ព្រមទាំងគិតគូរពីសិទ្ធិ និងឧត្តមប្រយោជន៍របស់អនីតិជន ដោយទុកឲ្យតុលាការជាអ្នកកំណត់យុត្តិធម៌តាមនីតិវិធីច្បាប់៕