រដ្ឋមន្ត្រីក្រសួងព័ត៌មានចេញសារព្រមាន កុំបន្តស៊ែរ បទចម្រៀង AI ខ្លឹមសារ «អាសអាភាស» ខណៈអាជ្ញាធរកំពុងស្រាវជ្រាវប្រភព

(ភ្នំពេញ)៖ ក្នុងរយៈពេលប៉ុន្មានម៉ោងចុងក្រោយនេះ មានការសង្កេតឃើញថា នៅលើបណ្ដាញសង្គមដូចជា Facebook និង TikTok មានអ្នកប្រើប្រាស់មួយចំនួនបាននាំគ្នាស៊ែរ និងប្រើប្រាស់បទចម្រៀងមួយដែលមានខ្លឹមសារ «អាសអាភាស និងមិនសមរម្យ» បង្កឲ្យមានការព្រួយបារម្ភពីសាធារណជន។ នេះបើតាមប្រភពពីឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មានបានបង្ហោះលើបណ្ដាញសង្គមហ្វេសប៊ុកដែលអង្គភាព The Mirror News ទទួលបាននៅយប់ថ្ងៃទី១៤ ខែមីនា ឆ្នាំ២០២៦នេះ។

ឯកឧត្ដម នេត្រ ភក្ត្រា បានបន្តថា តាមការស្រាវជ្រាវបឋម បទចម្រៀងខាងលើត្រូវបានសង្ស័យថាបង្កើតឡើងដោយបច្ចេកវិទ្យាបញ្ញាសប្បនិម្មិត (AI) និងអាចមានប្រភពចេញពីគណនីមួយឈ្មោះ “BLUE PRINT”។

ឯកឧត្ដមរដ្ឋមន្ត្រីបញ្ជាក់ថា បច្ចុប្បន្ន ក្រសួងពាក់ព័ន្ធ និងស្ថាប័នមានសមត្ថកិច្ច កំពុងបន្តស្រាវជ្រាវ ដើម្បីកំណត់ប្រភព និងចាត់វិធានការតាមផ្លូវច្បាប់។

ក្នុងនោះផងដែរ ឯកឧត្ដមបានអំពាវនាវដល់អ្នកប្រើប្រាស់បណ្ដាញសង្គមទាំងអស់ សូមកុំបន្តចែករំលែក ឬផ្សព្វផ្សាយខ្លឹមសារដែលមានលក្ខណៈប្រាស់ចាកក្រមសីលធម៌ និងអាសអាភាស ព្រមទាំងចូលរួមទប់ស្កាត់ការចែកចាយមាតិកាមិនសមរម្យ ដើម្បីរក្សាបរិយាកាសបណ្ដាញសង្គមឲ្យមានសុជីវធម៌ និងសុវត្ថិភាពសម្រាប់សាធារណជន៕