ភ្នំពេញមានការងារជាង ២ម៉ឺនកន្លែង កំពុងរង់ចាំអ្នកស្វែងរកការងារ និងអតីតពលករពីថៃ

(ភ្នំពេញ)៖​ រាជធានីភ្នំពេញ ដែលជាមជ្ឈមណ្ឌលសេដ្ឋកិច្ចសំខាន់របស់កម្ពុជា កំពុងមានឱកាសការងារជាង ២ម៉ឺនកន្លែង សម្រាប់អ្នកកំពុងស្វែងរកការងារ និងអតីតពលករដែលត្រឡប់មកពីប្រទេសថៃ។

យោងតាមការផ្សព្វផ្សាយរបស់ ក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា គិតត្រឹមថ្ងៃទី១៤ ខែមីនា ឆ្នាំ២០២៦ រាជធានីភ្នំពេញមានឱកាសការងារសរុបចំនួន ២០,៧៧១កន្លែង កំពុងត្រូវការកម្លាំងពលកម្ម ក្នុងវិស័យឧស្សាហកម្ម និងវិស័យសេវាកម្ម។

ក្រសួងបានបញ្ជាក់ថា បងប្អូនអតីតពលករដែលត្រឡប់មកពីប្រទេសថៃ និងប្រជាពលរដ្ឋដែលកំពុងស្វែងរកការងារ អាចពិនិត្យមើលព័ត៌មានលម្អិតអំពី ឈ្មោះរោងចក្រ វិស័យការងារ និងលេខទំនាក់ទំនង តាមរយៈខិតបណ្ណការងារដែលក្រសួងបានផ្សព្វផ្សាយ។

ជាមួយគ្នានេះដែរ អ្នកស្វែងរកការងារក៏អាចទាក់ទងដោយផ្ទាល់ទៅកាន់រោងចក្រ សហគ្រាសនានា ឬទំនាក់ទំនងទៅកាន់ ប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារជួយសម្របសម្រួល និងស្វែងរកឱកាសការងារសមស្របជូនផងដែរ៕