រាជរដ្ឋាភិបាលអនុម័តសេចក្តីព្រាងច្បាប់ប្រឆាំង “Scam Online” បង្កើនវិធានការបង្ក្រាបឧក្រិដ្ឋកម្មបច្ចេកវិទ្យា

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានដឹកនាំកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព នាព្រឹកថ្ងៃទី១៣ ខែមីនា ឆ្នាំ២០២៦ ដោយបានពិភាក្សា និងអនុម័ត សេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។

សេចក្តីព្រាងច្បាប់នេះ មាន៥ជំពូក និង២៤មាត្រា ត្រូវបានរៀបចំឡើងដើម្បីពង្រឹងវិធានការផ្នែកព្រហ្មទណ្ឌ ប្រយុទ្ធប្រឆាំងការឆបោកតាមអនឡាញ និងលើកកម្ពស់កិច្ចសហប្រតិបត្តិការអន្តរជាតិ ស្របតាមស្តង់ដាអន្តរជាតិ។

ច្បាប់ថ្មីនេះ ក៏បានបង្កើតបទល្មើសព្រហ្មទណ្ឌថ្មីៗមួយចំនួនរួមមាន បទឆបោកតាមប្រព័ន្ធបច្ចេកវិទ្យា ការដឹកនាំមជ្ឈមណ្ឌលឆបោក ការជ្រើសរើសបណ្តុះបណ្តាលអ្នកចូលរួមឆបោក និងការប្រមូលព័ត៌មានផ្ទាល់ខ្លួនរបស់អ្នកដទៃក្នុងចេតនាទុច្ចរិត។

ក្នុងកិច្ចប្រជុំដដែល សម្តេចធិបតីបានបញ្ជាក់ថា ការបង្ក្រាប Scam Online គឺជាឆន្ទៈពិតប្រាកដរបស់រាជរដ្ឋាភិបាល ដើម្បីការពារសន្តិសុខសង្គម កែលម្អមុខមាត់ប្រទេសលើឆាកអន្តរជាតិ និងបន្តប្រយុទ្ធប្រឆាំងឧក្រិដ្ឋកម្មបច្ចេកវិទ្យា ដោយមិនថយក្រោយឡើយ។

ជាមួយគ្នានេះ សម្តេចធិបតីក៏បានណែនាំឱ្យក្រសួង ស្ថាប័នពាក់ព័ន្ធ បន្តយកចិត្តទុកដាក់លើជីវភាពជនភៀសសឹក និងតាមដានសុវត្ថិភាពប្រជាពលរដ្ឋ និងនិស្សិតកម្ពុជាដែលកំពុងរស់នៅ និងសិក្សានៅបណ្តាប្រទេសមជ្ឈិមបូព៌ា៕