មន្ទីរសុខាភិបាលរាជធានីភ្នំពេញសម្រេចបិទទីតាំងផ្តល់សេវាសុខាភិបាលឯកជន ២កន្លែង នៅខណ្ឌសែនសុខ ព្រោះគ្មានលិខិតអនុញ្ញាត

(ភ្នំពេញ)៖ ប្រធានមន្ទីរសុខាភិបាលរាជធានីភ្នំពេញ លោកបណ្ឌិត ងី មានហេង បានសម្រេចបិទទីតាំងផ្តល់សេវាសុខាភិបាលឯកជនចំនួន២កន្លែង នៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ បន្ទាប់ពីរកឃើញថា «កំពុងដំណើរការដោយគ្មានលិខិតអនុញ្ញាតត្រឹមត្រូវពីអាជ្ញាធរមានសមត្ថកិច្ច»។ នេះបើតាមសេចក្ដីសម្រេចស្ដីពីការបិទទីតាំងផ្តល់សេវាសុខាភិបាលឯកជនដែលអង្គភាព The Mirror News ទទួលបាននៅថ្ងៃទី១៣​ ខែមីនា ឆ្នាំ២០២៦នេះ។

ទីតាំងទី១ គឺជាបន្ទប់ពិគ្រោះ និងព្យាបាលជំងឺទូទៅ ដែលមានឈ្មោះជាអក្សរចិន ដោយអ្នកទទួលខុសត្រូវជាជនជាតិចិន (មិនស្គាល់ឈ្មោះ) មានទីតាំងស្ថិតនៅផ្ទះលេខ ០៨៨ ផ្លូវណតប្រ៊ីត ក្រុមទី១ ភូមិទ្រុងមាន់ សង្កាត់ទឹកថ្លា ខណ្ឌសែនសុខ។ ក្រសួងសុខាភិបាលបានសម្រេចបិទទីតាំងនេះ ព្រោះដំណើរការដោយគ្មានលិខិតអនុញ្ញាត។

ចំណែកទីតាំងទី២ គឺបន្ទប់ពិគ្រោះ និងព្យាបាលជំងឺមាត់-ធ្មេញ “តាំង ប៊ុន ហេង” ដែលមានលោកស្រី ឡូត ស្រីតុន ជាអ្នកទទួលខុសត្រូវ មានទីតាំងនៅផ្ទះលេខ ៤២ ផ្លូវបេតុង ក្រុមទី៩ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ ក៏ត្រូវបានសម្រេចបិទដូចគ្នា ដោយសារគ្មានលិខិតអនុញ្ញាតដំណើរការ។

ក្នុងសេចក្តីសម្រេចដដែល លោកបណ្ឌិត ងី មានហេង បានប្រគល់ភារកិច្ចឲ្យប្រធានការិយាល័យនិយ័តកម្មសុខាភិបាល និងប្រធានការិយាល័យសុខាភិបាលស្រុកប្រតិបត្តិសែនសុខ រួមទាំងអ្នកពាក់ព័ន្ធ អនុវត្តសេចក្តីសម្រេចនេះឲ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ។

សកម្មភាពនេះ ត្រូវបានមើលឃើញថា ជាវិធានការរឹតបន្តឹងរបស់ក្រសួងសុខាភិបាល ក្នុងការគ្រប់គ្រង និងធានាគុណភាពសេវាសុខាភិបាលឯកជន ដើម្បីការពារសុវត្ថិភាព និងសុខុមាលភាពរបស់ប្រជាពលរដ្ឋ៕