ឧបនាយករដ្ឋមន្ត្រី ស សុខា ផ្អាកការងារបណ្តោះអាសន្ន ប្រធានពន្ធនាគារខេត្តស្ទឹងត្រែង និងមន្ត្រី៣នាក់ ពាក់ព័ន្ធការអនុញ្ញាតឲ្យអ្នកជាប់ឃុំប្រើទូរស័ព្ទ

(ភ្នំពេញ)៖ ប្រធានពន្ធនាគារខេត្តស្ទឹងត្រែង លោក លីម វាសនា និងមន្ត្រីពន្ធនាគារ៣នាក់ផ្សេងទៀត ត្រូវបាន អភិសន្តិបណ្ឌិត ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ សម្រេចផ្អាកការងារ និងមុខងារជាបណ្តោះអាសន្ន។ នេះបើតាមលិខិតសម្រេចរបស់អភិសន្តិបណ្ឌិត ស សុខា ដែលបណ្តាញព័ត៌មាន The Mirror News ទទួលបាន នៅថ្ងៃទី១៣ ខែមីនា ឆ្នាំ២០២៦។

ការសម្រេចផ្អាកតួនាទីជាបណ្តោះអាសន្ននេះ ធ្វើឡើងក្រោយមានព័ត៌មានត្រូវបានចែកចាយនៅលើបណ្តាញសង្គម និងបណ្តាញព័ត៌មានមួយចំនួនថា នៅក្នុងពន្ធនាគារខេត្តស្ទឹងត្រែង មានការអនុញ្ញាតឱ្យអ្នកជាប់ឃុំឃាំងអាចប្រើប្រាស់ទូរស័ព្ទ ដោយជាថ្នូរនឹងប្រាក់រាប់ពាន់ដុល្លារ។

បញ្ហានេះបានបង្កឲ្យមានការចាប់អារម្មណ៍ និងការសង្ស័យពីសាធារណជនចំពោះការគ្រប់គ្រង និងវិន័យនៅក្នុងពន្ធនាគារ ដោយក្រសួងមហាផ្ទៃបានសម្រេចចាត់វិធានការផ្អាកមុខងារជាបណ្តោះអាសន្ន ដើម្បីបើកការស៊ើបអង្កេត និងពិនិត្យការពិតពាក់ព័ន្ធករណីនេះ។

គួររម្លឹកថា លោក លីម វាសនា ក៏ធ្លាប់ត្រូវបានអភិសន្តិបណ្ឌិត ស សុខា សម្រេចផ្អាកការងារជាបណ្តោះអាសន្នម្តងរួចមកហើយ កាលពីថ្ងៃទី២៤ ខែកក្កដា ឆ្នាំ២០២៤៕