សម្តេចធិបតី ហ៊ុន ម៉ាណែត ដឹកនាំកិច្ចប្រជុំពេញអង្គគណៈរដ្ឋមន្ត្រី ពិភាក្សាបញ្ហា Online Scams ជនភៀសសឹក និងវាយតម្លៃសេដ្ឋកិច្ចកម្ពុជា ឆ្នាំ២០២៦

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃសុក្រ ទី១៣ ខែមីនា ឆ្នាំ២០២៦នេះ បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព ដើម្បីពិភាក្សា និងឆ្លងលើរបៀបវារៈសំខាន់ៗមួយចំនួនពាក់ព័ន្ធនឹងសន្តិសុខ សេដ្ឋកិច្ច និងការគ្រប់គ្រងបញ្ហាសង្គម។

យោងតាមរបៀបវារៈនៃកិច្ចប្រជុំបានផ្តោតលើបញ្ហាសំខាន់ៗចំនួន៤ រួមមាន៖

១. វឌ្ឍនភាពការអនុវត្តការងារ និងទិសដៅបន្ត ក្នុងការបោសសម្អាតអំពើឆបោកតាមប្រព័ន្ធបច្ចេកវិទ្យា (Online Scams) ដែលកំពុងក្លាយជាបញ្ហាប្រឈមមួយក្នុងតំបន់។

២. សេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលមានគោលបំណងពង្រឹងក្របខណ្ឌច្បាប់ និងការអនុវត្តច្បាប់ក្នុងការបង្ក្រាបបទល្មើសតាមប្រព័ន្ធឌីជីថល។

៣. របាយការណ៍វឌ្ឍនភាពស្តីពីការដោះស្រាយបញ្ហាជនភៀសសឹក ដើម្បីពិនិត្យមើលដំណើរការដោះស្រាយ និងការសហការជាមួយភាគីពាក់ព័ន្ធ។

៤. ការវាយតម្លៃស្ថានភាពសេដ្ឋកិច្ចកម្ពុជា ឆ្នាំ២០២៦ ដោយផ្អែកលើហានិភ័យថ្មីៗដែលកើតចេញពីការប្រែប្រួលនៃភូមិសាស្ត្រនយោបាយ សេដ្ឋកិច្ចសកល និងតំបន់ ព្រមទាំងបញ្ហាប្រឈមក្នុងស្រុក។

កិច្ចប្រជុំពេញអង្គគណៈរដ្ឋមន្ត្រីនេះ ត្រូវបានចាត់ទុកថា ជាវេទិកាសំខាន់សម្រាប់រាជរដ្ឋាភិបាលក្នុងការពិនិត្យ និងកំណត់ទិសដៅនយោបាយសាធារណៈ ដើម្បីឆ្លើយតបទៅនឹងបញ្ហាប្រឈមថ្មីៗដែលកម្ពុជាកំពុងប្រឈមក្នុងបរិបទតំបន់ និងពិភពលោក៕